شىرشادان شىققان ءورت: تالدىقورعان تۇرعىنى كورشىسىنىڭ ەكى بالاسىن قۇتقاردى
وبلىستىق توتەنشە جاعدايلار دەپارتامەنتى تاراتقان مالىمەتكە سەنسەك، 26-جەلتوقسان ساعات 10.36-دا قۇتقارۋشىلارعا تالدىقورعان قالاسى بولاشاق شاعىناۋدانىنداعى كوپپاتەرلى تۇرعىن ءۇيدىڭ 5-قاباتىندا پاتەر ورتەندى دەگەن حابارلاما كەلىپ ءتۇستى.
وقيعا ورنىنا الماتى وبلىسى ت ج د- نەن 16 قىزمەتكەر مەن 6 تەحنيكا، سونداي- اق باسقا دا شۇعىل قىزمەتتەر دەرەۋ جىبەرىلدى. پاتەردە جاساندى شىرشا مەن 0,5 شارشى مەتر الاڭدا ديۆان جانعانى انىقتالدى. ورتكە قارسى بولىمشە كەلگەنگە دەيىن كورشى الىشەر ەرىكوۆ ەكى بالانى پاتەردەن شىعارىپ، ءورتتى ءسوندىرىپ ۇلگەرگەن. قازا بولعاندار مەن زارداپ شەككەندەر جوق.
ءورتتىڭ شىعۋىنا ىشكى ەلەكتر جەلىسىنە قوسىلعان ەلەكتر گيرليانداسىنىڭ قىسقا تۇيىقتالۋى سەبەپ بولعان. الماتى وبلىسىنىڭ ت ج د ازاماتتاردان جاڭاجىلدىق شىرشانى ورناتۋ كەزىندە ءورت قاۋىپسىزدىگى ەرەجەلەرىن ساقتاۋدى سۇرايدى.
- شىرشانى بۇتاقتار، قابىرعالار مەن توبەگە ءتيىپ كەتپەۋى ءۇشىن تۇراقتى نەگىزگە قويىڭىز؛
- ونى بەزەندىرۋ ءۇشىن قاعاز، ماقتا ويىنشىقتارىن، شامداردى پايدالانباڭىز، نەگىزدى ماقتامەن جاپپاڭىز؛
- ەلەكتر گيرلياندالارى زاۋىتتا شىعارىلعان (سەرتيفيكاتتالعان) بولۋى جانە سىمداردىڭ قىزۋى، ۇشقىنداۋ، شامداردىڭ جىپىلىقتاۋى جانە ت. ب. سياقتى زاقىمدارى بولماۋى ءتيىس.؛
- شىرشانىڭ جانىندا بەنگال وتتارىن جانە شارتىلداقتاردى پايدالانباڭىز؛
- بالالاردىڭ وزدىگىنەن جارىق قوسۋىنا جول بەرمەڭىز؛
- ەلەكتر گيرليانداسىن ەلەكتر جەلىسىنە قوسىپ، ۇيدەن شىقپاڭىز.
