بەسىنشى سىنىپ وقۋشىسى ورتەنىپ جاتقان ۇيدەن ءتورت بالانى امان الىپ قالدى - فوتو

2021 -جىلعى 25-جەلتوقساندا ساعات 11:36-دا 101 قىزمەتىنە قوستاناي قالاسىنداعى «سادوۆود» ساياجايى اۋماعىندا ءورت شىققانى تۋرالى حابارلاما كەلىپ ءتۇستى. كۋاگەر ساياجايدىڭ ورتەنىپ جاتقانىن حابارلاعان. ءورت سوندىرۋشىلەر كەلگەن كەزدە ءتىلسىز جاۋ 6 ادام تۇراتىن تۇرعىن ءۇيدىڭ 60 شارشى مەتر اۋماعىن شارپىعان. ءورت شاتىر تاقتالارى مەن تۇرعىن ۇيلەردىڭ ىشىنە جايىلعان. ۇيدە ەشكىم بولعان جوق.

«بۇل كۇنى قوستاناي قالاسىنىڭ №22-ورتا مەكتەبىنىڭ 5-سىنىپ وقۋشىسى «سادوۆود» ساياجايىندا تۇراتىن ولەگ پيروگ كوشەدە ويناپ ءجۇرىپ، كورشى ۇيدەن ءتۇتىن شىعىپ جاتقانىن كورەدى. ولەگ مۇندا كامەلەتكە تولماعان بالالارى بار كوپ بالالى وتباسى تۇراتىنىن بىلەدى. ۇلكەن قىزى 8 جاستا، ال ەڭ كىشىسى 2 جاستا. ءورت سوندىرۋشىلەردىڭ كەلۋىن كۇتپەي، ول تۇتىندەگەن ۇيگە تەرەزە ارقىلى كىرىپ، ءوز ءومىرىن قاتەرگە تىگە وتىرىپ 4 بالانى كەزەكپەن كوشەگە شىعارعان. بۇل ۋاقىتتا اتا-انالارى ۇيدە بولماعان. ولار پەشتى جاعىپ، دۇكەنگە كەتتى»، - دەپ ءتۇسىندىردى دەپارتامەنت.

اتا-انالارى كەلگەنگە دەيىن قۇتقارىلعان بالالار كورشىلەرىنىڭ ۇيىندە بولعان. اۋرۋحاناعا جاتقىزۋ قاجەتتىلىگى بولعان جوق. كەلگەن ءورت سوندىرۋشىلەر جانىپ جاتقان ۇيدەن ەكى گاز باللونىن شىعاردى. قۇتقارۋشىلار ءورتتى 12:07-دە وقشاۋلاپ، كورشى ساياجايلارعا تارالۋ قاۋپىن جويدى. ساعات 12:28-دە ءورت ءسوندىرىلدى. توتەنشە جاعدايلار مينيسترلىگى حابارلاعانداي، ءورتتىڭ شىعۋىنا جىلىتۋ پەشىنىڭ دۇرىس جۇمىس ىستەمەۋى سەبەپ بولعان.

اۆتور: ەركەجان سماعۇل

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى