بريتاندىق كينوكومپانيا قازاقستانداعى يادرولىق سىناقتار تۋرالى دەرەكتى فيلم ءتۇسىردى

Spring Films بريتاندىق كينوكومپانيا تۋىندىسىنىڭ باس كەيىپكەرى - قاراعاندىلىق سۋرەتشى جانە انتيادرولىق قوزعالىستىڭ بەلسەندىسى كارىپبەك كۇيىكوۆ، دەپ حابارلايدى قازاقپارات ءتىلىشىسى. «فيلمدى بريتاندىق رەجيسسەر جانە دەرەكتى فيلم ءتۇسىرۋشى اندرە سينگەر ءتۇسىردى. كارتينا مەنىڭ سۋرەت سالۋىمنان باستالادى، ال فينالدا مەن ءوز جۇمىسىمدى اياقتايمىن. تاسپا 2016 -جىلى ەكى كەزەڭدە - قىستا جانە جازدا ءتۇسىرىلدى. وندا ءبىزدىڭ سەمەي پوليگونىندا عانا ەمەس، باسقا ەلدەردە دە يادرولىق سىناقتارعا قارسى كۇرەس جۇرگىزگەن ادامدار تۋرالى ايتىلادى. بيىل سەمەي پوليگونىن جابۋ تۋرالى جارلىقتىڭ شىققانىنا 30 جىل تولادى. مەن يادرولىق قارۋدان باس تارتقان ەلدە تۇراتىنىمدى ماقتان تۇتامىن»، - دەيدى «اتوم» جاھاندىق جوباسىنىڭ قۇرمەتتى ەلشىسى كارىپبەك كۇيىكوۆ.

سۋرەتشىنىڭ ايتۋىنشا، انتيادرولىق قوزعالىسقا العاشقىلاردىڭ ءبىرى بولىپ قاراعاندىلىق كەنشىلەر قوسىلعان. ولار سوۆەتسكي داڭعىلىنا، قازىرگى بۇقار جىراۋ داڭعىلىنا ميتينگىگە شىققان جانە ولاردىڭ تالاپتارىنىڭ قاتارىندا سەمەي پوليگونىن جابۋ بولدى.

«فيلمدە مەن عانا ەمەس، نەۆادا- سەمەي انتيادرولىق قوزعالىسىنىڭ قاراعاندى بولىمشەسىنىڭ ءتوراعاسى مارعۇلان حاميەۆ، سونداي-اق جەرلەس - جازۋشى ميحايل برودسكي تۋرالى باياندالادى. كينوكارتينادا پوليگونداعى جارىلىستان مۇگەدەك بولعان سەمەي تۇرعىنى بەرىك سىزدىقوۆتىڭ ءومىرى تۋرالى دا ايتىلادى. ونىڭ قاسى مەن قاباقتىڭ اينالاسىنداعى تەرىسى ءوسىپ، زاعيپ بولىپ قالعان»، - دەدى كارىپبەك كۇيىكوۆ.

سونداي-اق «سارىجايلاۋ» كينوتەاترىندا كارىپبەك كۇيىكوۆتىڭ سۋرەتتەرىنىڭ كورمەسى ءوتتى.

«ەكسپوزيتسيادا مەنىڭ جۇمىستارىمنىڭ از بولىگى ۇسىنىلعان، قازىر كوپتەگەن كارتينالار جەزقازعاندا ورنالاسقان. شىعارماشىلىقتىڭ نەگىزگى باعىتى - پەيزاجداردا، مەنىڭ شىعارمالارىمدا يادرولىق تاقىرىپ ءارقاشان بولادى. سەبەبى ولار ادامدارعا يادرولىق سىناقتار تۋرالى ۇنەمى ەسكە سالادى»، - دەيدى سۋرەتشى.

دەرەكتى فيلم الماتى مەن نۇر-سۇلتاندا دا كورسەتىلدى.

ەسكە سالا كەتەيىك، سەمەي يادرولىق پوليگونىندا 600-دەن استام يادرولىق جانە تەرمويادرولىق بومبالاردىڭ 500 گە جۋىق جارىلىسى جاسالعان بولاتىن. پوليگون 1991 -جىلى جابىلدى.

اۆتور: اگاتا مۋحامەدجانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى