قىتايدىڭ ءىرى مەگاپوليسىندە لوكداۋن ەنگىزىلدى
بەيسەنبى كۇنى سيان قالاسىنىڭ حالىقارالىق اۋەجايى بارلىق ىشكى 765 رەيستى توقتاتتى، كوپتەگەن باعىتتار بويىنشا پويىزدار جۇرمەيدى. بەيسەنبىدەن باستاپ 2020-جىلعىداي قاتاڭ لوكداۋن ەنگىزىلدى، مەگاپوليس تۇرعىندارىنا ۇيىنەن شىقپاۋعا نۇسقاۋ بەرىلدى.
ءبىر ۇيدەن ءبىر ادام ەكى كۇندە ءبىر رەت قانا دۇكەنگە ەڭ قاجەتتى ازىق-تۇلىك الۋعا بارا الادى.
سيانداعى بارلىق بۇقارالىق شارالار وتكىزىلمەيتىن بولدى. كاسىپورىن قىزمەتشىلەرى قاشىقتان جۇمىس ىستەۋگە كوشىرىلىپ جاتىر.
قالادا 3,5 مىڭ مەكتەپ جابىلىپ، وقۋشىلار قاشىقتان وقۋعا جىبەرىلدى. جەرگىلىكتى ب ا ق- تىڭ جازۋىنشا، ءبىلىم بەرەتىن مەكەمەلەردىڭ جابىلۋى 2 ميلليوننان استام ادامعا تىكەلەي اسەر ەتتى.
قازىرگى تاڭدا مەگاپوليستە ەپيدەميولوگيالىق قاۋىپ جوعارى ءبىر اۋدان جانە ەپيدەميولوگيالىق قاۋىپ ورتاشا 40 اۋدان بار. قالادان شىعۋ ءۇشىن كوروناۆيرۋس جوق دەگەن تەست سەرتيفيكاتى مەن جەرگىلىكتى بيلىكتەن حات كورسەتۋ قاجەت.
9 - جەلتوقساننان بەرى سيان قالاسىندا كوروناۆيرۋس جۇقتىرۋدىڭ 200 دەن استام وقيعاسى انىقتالدى. ال سارسەنبى كۇنى ءبىر تاۋلىكتە 127 ادامنان ۆيرۋس تابىلىپ، ەڭ جوعارى كورسەتكىش تىركەلگەن.
سياندا شەكتەۋ شارالارىن كۇشەيتۋ ەلدە قىسقى وليمپيادا ويىندارى مەن ءداستۇرلى تۇردە حالىق كوپ قىدىراتىن قىتاي جاڭا جىلى قارساڭىندا كوروناۆيرۋستىڭ تارالۋىن بولدىرماۋ ءۇشن قاجەت.
