تالدىقورعانداعى ەسكى ۇيلەر بىرتىندەپ سۇرىلەدى
الماتى وبلىسىنىڭ اكىمى قانات بوزىمبايەۆ تالدىقورعاننىڭ دامۋ جوسپارىمەن تانىسۋ بارىسىندا وسىنداي تاپسىرما بەردى، دەپ حابارلايدى قازاقپارات ءتىلشىسى.
تالدىقورعانداعى «كورمە كەشەنىندە» قانات بوزىمبايەۆقا تالدىقورعاننىڭ دامۋ جوسپارى باياندالدى.
قالانىڭ باس جوسپارى، قالا اۋماعىنىڭ جيناقى قۇرىلىسى جونىندەگى كەشەندى جوسپارى، تالدىقورعانعا كىرەبەرىس اۋماقتى اباتتاندىرۋ جانە باسقا دا ماڭىزدى اقپاراتتار تانىستىرىلدى.
«تالدىقورعان جاس قالا بولعانىمەن، ونىڭ ءوز تاريحى بار. سوندىقتان ساۋلەتشىلەر، ديزاينەرلەر جانە تاريحشىلار ءوزارا بىرلەسە وتىرىپ، جەتىسۋدىڭ تاريحىمەن ۇيلەسەتىن ساۋلەتتىك كەلبەتىن قالىپتاستىرۋدى ويلاستىرۋ كەرەك. كورگەن ادام قالانىڭ بەت-بەينەسى بىردەن تانيتىنداي بولۋى كەرەك. اباتتاندىرۋ كەزىندە جىلى تۇستەردى كوبىرەك پايدالانعان ءجون. ديزاين-كود دايىندالسىن. كوگالداندىرۋ بارىسىندا ءبىر جىلدىق وسىمدىكتەردى وتىرعىزۋدى توقتاتىپ، كوپجىلدىق وسىمدىكتەرگە كوشۋ كەرەك. ولاردى دەر كەزىندە سۋارۋ مەن باپتاۋ جۇمىستارى ارنايى مەكەمەگە بەكىتىلىپ بەرىلۋى ءتيىس. قالانىڭ جاسىل جەلەكتى سيپاتىن ساقتاۋىمىز كەرەك. شاعىن ساۋلەتتىك فورمالار، ورىندىقتار، كوشە شامدارى - جالپى اباتتاندىرۋعا كەرەكتىڭ ءبارىن مۇمكىندىگىنشە جەرگىلىكتى جەردە شىعاراتىنداردان الىڭىزدار. جاڭا شاعىن اۋداندار دامىپ كەلەدى. ەندى قالانىڭ ەسكى بولىگىمەن اينالىسۋ كەرەك. تىعىز ورنالاستىرۋ ماقساتىندا ەڭ الدىمەن نەگىزگى كوشەلەردەگى كونە ۇيلەردىڭ كەمىندە ءبىر-ەكى قاتارىنىڭ ورنىن ساتىپ الىپ، وعان تۇگەلدەي زاماناۋي كوپ قاباتتى تۇرعىن ۇيلەر سالۋ قاجەت. سوندا، بىرىنشىدەن، قالانىڭ ساۋلەتتىك كەلبەتىن جاقسارتامىز، ەكىنشىدەن، حالىقتىڭ جايلى ءومىر سۇرۋىنە جاعداي جاسالادى. قاجەت بولسا، قالا كەڭىستىگىن قالىپتاستىرۋ جونىندەگى ارنايى مامانداردى شاقىرايىق»، - دەدى قانات بوزىمبايەۆ.
پرەزەنتاتسيا بارىسىندا قالانىڭ جاڭا تۇرعىن ءۇي ماسسيۆتەرىن گازداندىرۋ، ساياجاي قاۋىمداستىقتارىن ينفراقۇرىلىممەن قامتۋ، تۇرعىن ءۇي قۇرىلىسى ماسەلەلەرىنە قاتىستى دا تاقىرىپتار تالقىلاندى.
سول سياقتى «اقىلدى قالا» جوباسى تانىستىرىلدى.
