قازاقستان الەمدەگى موبيلدى ينتەرنەت باعاسى ەڭ تومەن ەلدەردىڭ ۇشتىگىنە كىرەدى

بۇل تۋرالى ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترىنىڭ مىندەتىن اتقارۋشى اسحات ورازبەك ايتتى، دەپ حابارلايدى قازاقپارات ءتىلشىسى.

«قازاقستان الەمدەگى موبيلدى ينتەرنەت باعاسى ەڭ تومەن ەلدەردىڭ ۇشتىگىنە كىرەدى. الەمدەگى 1 گ ب ورتاشا قۇنى 8,53 ا ق ش دوللارىن قۇرايدى. بۇل رەتتە، قازاقستاندا 1 گ ب ورتاشا قۇنى 0,49 ا ق ش دوللارىن تەڭ. بۇل ەلىمىزگە الەمدە 2-ورىن جانە ت م د ەلدەرى اراسىندا 1-ورىن الۋعا مۇمكىندىك بەردى»، - دەپ اتاپ وتەدى ول ءماجىلىس دەپۋتاتتارىنىڭ ساۋالىنا بەرگەن جاۋابىندا.

ونىڭ دەرەگىنشە، ينتەرنەتكە قوسىلۋ جىلدامدىعىنىڭ جاھاندىق يندەكسىنە سايكەس قازاقستان رەسپۋبليكاسىندا ۇيالى بايلانىس تەحنولوگيالارى بويىنشا دەرەكتەردى جۇكتەۋدىڭ ورتاشا جىلدامدىعى 31,8 مبيت/سەكۋندتى، ال رەسەي فەدەراتسياسىندا - 28,9، ۋكراينادا - 31,9، بەلارۋس رەسپۋبليكاسىندا - 19,4، وزبەكستان رەسپۋبليكاسىندا - 19,24 ، قىرعىز رەسپۋبليكاسىندا 24,7 مبيت/سەكۋندتى قۇرايدى.

«وپەراتورلار اراسىنداعى باسەكەلەستىكتى دامىتۋ ماقساتىندا مينيسترلىك وسى جيىلىكتەردى ودان ءارى اۋكسيونعا شىعارۋ ماقساتىندا جۇمىس ىستەپ تۇرعان وپەراتورلاردان پايدالانىلمايتىن جيىلىكتەردى الىپ قويۋ جۇمىستارىن جۇرگىزۋدە. اۋكتسيوندار وتكىزۋ جاڭا كومپانيالارعا بەلگىلى ءبىر جيىلىك دياپازونىن ساتىپ الۋعا جانە ءوز ينفراقۇرىلىمىن ۇيىمداستىرۋ بويىنشا جۇمىستاردى باستاۋعا مۇمكىندىك بەرەدى»، - دەدى اسحات ورازبەك.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى