نۇرسۇلتان نازاربايەۆ جاستاردىڭ ەسىنە الاش وسيەتىن سالدى
«ارداقتى مەنىڭ دوستارىم! تاۋەلسىزدىكپەن قاتار دۇنيەگە كەلگەن ۇرپاق قازىر «وردا بۇزار» 30 عا تولىپ وتىر. بۋىنى بەكىپ، قاناتى قاتايىپ، تالاي يگىلىكتى ىسكە ۇيىتقى بولار جاسقا جەتتى. تۋىمىزدى بيىك ۇستايتىن، ۇلتىمىزدى ۇلى مۇراتتارعا باستايتىن، سول تاۋەلسىزدىك ۇرپاقتارى سەندەرسىڭدەر. قاي زاماندا دا تاريحتى وزدەرىڭ سياقتى جالىندى جاستار، ءبىلىمدى ازاماتتار جاساعان. سەندەرگە ايتارىم، ءار كەزەڭنىڭ ءوز قيىندىعى مەن سىناعى بولادى. قازىرگى كۇردەلى احۋالدى كورىپ وتىرسىڭدار. دۇنيە مىڭ قۇبىلىپ تۇر»، - دەدى نۇرسۇلتان نازاربايەۆ.
سونداي- اق ەلباسى ول اۋمالى- توكپەلى زاماندا ەلدىك جۇگىن اۋدىرماي الىپ شىعۋ ءۇشىن ءبىلىم مەن عىلىمعا ارقا سۇيەۋ كەرەكتىگىن ايتتى.
«وسىناۋ اۋمالى- توكپەلى زاماندا تەك ءبىلىم مەن عىلىم قۋعان ەل سەنىمدى العا باسادى. وسى جولدان تايماڭدار. ءبىز تەكتى حالىقتىڭ ۇرپاعىمىز. قانىمىزدا قايسارلىق، بويىمىزدا باتىرلىق، جۇرەگىمىزدە جىگەر بار. وسى ورايدا الاش قايراتكەرلەرىنىڭ مىنا ءبىر وسيەتى ويىما ورالىپ وتىر. ء«بىز باي، ءبىلىمدى ءارى كۇشتى بولۋىمىز كەرەك. باي بولۋ ءۇشىن - كاسىپ، ءبىلىمدى بولۋ ءۇشىن - وقۋ كەرەك. ال كۇشتى بولۋ ءۇشىن - ەلدىڭ بىرلىگى كەرەك». بەرەكە- بىرلىك باردا الىنبايتىن اسۋ، باعىنبايتىن بەلەس جوق»، - دەدى ەلباسى.
ن. نازاربايەۆ اتاپ وتكەندەي، قازاق حالقىنىڭ ۇلى جەڭىستەرىنىڭ ءبارى تاتۋلىق پەن تۇراقتىلىقتىڭ ارقاسىندا كەلگەن.
«ءالى دە العا قويعان اسقاق ارماندارىمىز، بيىك ماقساتتارىمىز كوپ. قازاقستاندى وزىق 30 ەلدىڭ قاتارىنا قوسۋ - بارشامىزدىڭ ورتاق مىندەتىمىز. وسى ورايدا جاستارعا زور ءۇمىت ارتامىن. سەندەردى ۇلت مۇددەسى جولىندا ايانباي قىزمەت ەتۋگە شاقىرامىن. ەگەمەندىك حالقىمىزدىڭ ەڭ قاستەرلى قۇندىلىعى ەكەنىن ەشقاشان ۇمىتپاڭدار. تاۋەلسىزدىگىمىز تۇعىرلى، ەلىمىز امان، جۇرتىمىز تىنىش بولسىن!»، - دەپ تۇيىندەدى ق ر تۇڭعىش پرەزيدەنتى.
