بايبەك: بيلەۋشى پارتيانىڭ ءتوراعاسى لاۋازىمىن پرەزيدەنتكە تاپسىرۋ – زاڭدىلىق
دەپ حابارلايدى قازاقپارات اتالمىش ساياسي ۇيىمنىڭ باسپا ءسوز قىزمەتىنە سىلتەمە جاساپ.
«قاسىم- جومارت كەمەل ۇلى «Nur Otan» قۇرىلعاننان باستاپ ونىڭ باسى- قاسىندا. ۇزاق ۋاقىت پارتيانىڭ باسقارۋشى جانە ماڭىزدى شەشىمدەر قابىلداۋشى ورگانى - ساياسي كەڭەس بيۋروسىنىڭ مۇشەسى بولىپ تابىلادى. 2019 -جىلى پرەزيدەنت لاۋازىمىنا كانديدات رەتىندە قاسىم- جومارت كەمەل ۇلى وسى «Nur Otan» - نان ۇسىنىلدى. سوڭعى پارلامەنت سايلاۋىندا پارتيا مەملەكەت باسشىسى ءوزى جاريا ەتكەن سايلاۋالدى باعدارلامامەن ايقىن جەڭىسكە جەتتى. سول بەرىلگەن ۋادەلەردى ورىنداۋ - بيلەۋشى پارتيانىڭ قازىرگى ۋاقىتتاعى باستى مىندەتى.
ەلباسى اتاپ وتكەندەي، قازىر «Nur Otan» قوعامدى پرەزيدەنتىمىزدىڭ مەملەكەتتىك باعدارى توڭىرەگىنە توپتاستىرۋى قاجەت. بۇل شەشىم ەل ىشىندەگى جانە سىرتىنداعى بارلىق تاراپتارعا بيلىكتىڭ تۇتاستىعىن جانە ونىڭ ساباقتاستىق ساياساتىنا تولىقتاي بەرىك ەكەندىگىن كورسەتەدى. قوسارلانعان بيلىك تۋرالى ايتىلعان بارلىق نەگىزسىز پىكىرلەر مەن ورىنسىز ۇيعارىمداردى تەرىسكە شىعاراتىن قادام. ەلباسىنىڭ ەل ءۇشىن جانە بيلەۋشى پارتيا ءۇشىن وسىنداي ماڭىزدى شەشىمدى تاۋەلسىزدىگىمىزدىڭ 30 جىلدىعىندا قابىلداۋى ۇلكەن سيمۆولدىق مانگە يە دەپ بىلەمىن»، - دەپ اتاپ ءوتتى باۋىرجان بايبەك.
