ەكپە الۋدى سىناعانداردىڭ باسىم كوپشىلىگى قازىر ۆاكسينا الدى - مينيستر

بۇل تۋرالى ق ر دەنساۋلىق ءمينيسترى الەكسەي سوي ءمالىم ەتتى، دەپ حابارلايدى قازاقپارات ءتىلشىسى.

«تاياۋدا «كوروناۆيرۋسقا قارسى ۆاكسينا الۋدى مىندەتتەمەڭىزدەر» دەپ تالاپ قويعاندار بولدى. مەنىڭ ايتارىم، قازاقستاندا ۆاكسينا الۋ مىندەتتى ەمەس، ەشكىمدى ماجبۇرلەمەيدى. ەكپە العىڭىز كەلمەسە ەرىك وزىڭىزدە، سىزگە ەشكىم قيناپ ۆاكسينا سالمايدى. ال رەۆاكسيناتسياعا كەلسەك، ول قايتا ەكپە الىپ، يممۋنيتەتىمدى كۇشەيتەمىن دەۋشىلەرگە ارنالىپ وتىر. بۇل اڭگىمە بالالار ۆاكسيناسىنا دا قاتىستى. اتا-انانىڭ ءوز ەركىندە»، - دەدى ا. سوي ۇكىمەت ۇيىندە تىلشىلەردىڭ سۇراعىنا جاۋاپ بەرە تۇرا.

ونىڭ ايتۋىنشا، مينيسترلىك حالىقتى ۆاكسينا الۋعا ماجبۇرلەمەيدى، دەگەنمەن ءتۇسىندىرۋ جۇمىسىن جۇرگىزەدى.

«ارينە، ۆاكسينا الۋعا قاتىستى ءتۇسىندىرۋ جۇمىسى كەرەك. ونىڭ ۇستىنە قازىر قوعام بەلسەندى، ءبىزدىڭ كومەگىمىزسىز دە بەلسەندىلەر ءتۇسىندىرىپ جاتادى. ال قۇزىرلى ورگان رەتىندە رەسمي دەرەكتەردى جيناپ، حالىققا ۇسىنىپ، ءتۇسىندىرۋ - ءبىزدىڭ مىندەتىمىز. تاعى ءبىر بايقاعانىمىز سوڭعى ۋاقىتتا ۆاكسينا الۋعا قارسى شىعۋشىلاردىڭ سانى ازايىپ كەلەدى. بۇرىن ءجيى تۇعىن. بۇل ماسەلە بويىنشا بىزدە مونيتورينگ جاساپ، قاداعالاپ وتىرمىز. دەمەك قوعامنىڭ كوزى جەتتى دەگەن ءسوز. بۇگىندە قازاقستاندىقتاردىڭ 70 پايىزدان استامى كوروناۆيرۋسقا قارسى ۆاكسينا الدى. ەكپە الۋدى سىناعان قاۋىمنىڭ باسىم كوپشىلىگى قازىرگى كۇنى ۆاكسينا العان»، - دەيدى ول.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى