قازاقستاندا ينتەرنەت- الاياقتىق ءورشىپ تۇر
بۇل تۋرالى ق ر ءى ءى م كريمينالدىق پوليتسيا دەپارتامەنتى باستىعىنىڭ ورىنباسارى قانات نۇرماعامبەتوۆ ايتتى، دەپ حابارلايدى قازاقپارات ءتىلشىسى.
«ينتەرنەت- الاياقتىق قازىرگى تاڭداعى ەلىمىزدە جانە بۇكىل الەمدە ورىن الىپ وتىرعان وزەكتى ماسەلەلەردىڭ ءبىرى بولىپ وتىر. مەملەكەت باسشىسى وسى جىلعى قازاقستان حالقىنا جولداۋىندا الاياقتىق قىلمىستارعا قارسى ناقتى شارالار قابىلداۋ كەرەك ەكەنىن اتاپ ءوتتى. الاياقتار ازاماتتاردى الداۋ ءۇشىن ءار ءتۇرلى امالداردى قولدانادى. سول سەبەپتەن، وسىنداي قىلمىستاردىڭ سانى جىلدان جىلعا كوبەيۋدە»، - دەدى ول ءى ءى م باسپا ءسوز الاڭىندا وتكەن بريفينگتە. قانات نۇرماعامبەتوۆتىڭ اتاپ وتۋىنشە، سيفرلىق تەحنولوگيالاردىڭ دامۋى ولاردى قولدانۋ ارقىلى جاسالاتىن ۇرلىقتىڭ ارتۋىنا الىپ كەلدى.
«سوڭعى ۋاقىتتا ينتەرنەت- الاياقتىق ۇلكەن قوعامدىق رەزونانس تۋدىرىپ وتىر. ەگەر 2019 -جىلى قازاقستاندا مۇنداي قىلمىستاردىڭ سانى 7700 بولسا، 2020 -جىلدىڭ قورىتىندىسىندا 14 مىڭنان اسىپ ءتۇستى. وسى جىلدىڭ 10 ايىندا وتكەن جىلدىڭ ءدال وسىنداي كەزەڭىمەن سالىستىرعاندا ولاردىڭ سانى 80 پايىزعا ارتىپ، 17800 قىلمىسقا جەتىپ وتىر»، - دەدى دەپارتامەنت باستىعىنىڭ ورىنباسارى.
اۆتور: مارلان جيەمباي
