ەلوردادا مادەنيەت قىزمەتكەرلەرى اراسىندا شاعىن فۋتبولدان تۋرنير ءوتتى

وعان نۇر-سۇلتان قالاسىنداعى مادەنيەت ۇيىمدارى قاتىستى، دەپ حابارلايدى قازاقپارات اكىمدىكتىڭ رەسمي سايتىنا سىلتەمە جاساپ.

«بۇگىن ءبىز العاش رەت مادەنيەت ۇيىمدارى اراسىندا شاعىن فۋتبولدان Madeniet cup تۋرنيرىن وتكىزىپ جاتىرمىز. بۇل تۋرنيردىڭ ماقساتى - قالامىزدىڭ مادەنيەت ۇيىمدارىنىڭ باسىن قوسىپ، بۇقارالىق سپورتتى دامىتۋ. پرەزيدەنتىمىز ءوزىنىڭ جولداۋىندا بۇقارالىق سپورتتى دامىتۋعا اسا كوڭىل بولگەن. وسى ماقساتتى پايدالانا وتىرىپ ءبىز بۇگىنگى تۋرنيرىمىزدى وتكىزىپ جاتىرمىز. نۇر-سۇلتان قالاسىندا ورنالاسقان بارلىق مادەنيەت ۇيىمدارى - تەاتر، فيلارمونيا، سيركىمىز وسى جارىسقا قاتىسىپ وتىر»، - دەدى نۇر-سۇلتان قالاسى مادەنيەت باسقارماسى باسشىسىنىڭ ورىنباسارى جاڭاباي مەيىرمانقۇلوۆ.

«استانا-ارەنا» سپورت كەشەنىندە وتكەن تۋرنيرگە 7 كوماندا قاتىستى. ءار كوماندا قۇرامىندا 10 ادام (الاڭدا 5+1، قوسىمشا 4 ويىنشى) بار. جارىس باعدارلاماسىنا سايكەس، توپتىق كەزەڭ مەن شيرەك فينالدا ءبىر تايم ۋاقىتى - 15 مينۋت، تايم اراسىنداعى ءۇزىلىس - 5 مينۋت.

تۋرنيرگە ءبىر مەكەمەدەن تەك ءبىر كوماندا عانا قاتىستى. تۋرنير قاتىسۋشىلارى مۇنداي شارالاردىڭ دەنساۋلىققا پايداسىنان بولەك، مادەنيەت قىزمەتكەرلەرىنىڭ تانىسىپ، تابىسۋىنا مۇمكىندىك بەرەتىنىن ەرەكشە اتاپ ءوتتى.

«وسىنداي سپورتتىق-مادەني شاراعا قاتىسىپ جاتقانىمىزعا وتە قۋانىشتىمىز. بۇل - بۇرىننان كەلە جاتقان ءۇردىس. بيىل مىنە فۋتبولعا دەن قويىلىپ كەلە جاتىر. ءبىز ءۇشىن وتە ۇلكەن مەرەكە. ەڭ باستىسى ارينە، دەننىڭ ساۋلىعى»، - دەپ پىكىرىمەن ءبولىستى «جاستار» تەاترىنىڭ اكتەرى داۋرەن سەرعازين.

تارتىستى وتكەن ماتچتاردىڭ قورىتىندىسى: I ورىن - نۇر-سۇلتان قالاسى اكىمدىگىنىڭ «مۋزىكالىق جاس كورەرمەن تەاترى» كومانداسى. II ورىن - ەركەعالي راحماديەۆ اتىنداعى «مەملەكەتتىك فيلارمونيا» كومانداسى. Ⅲ ورىن - نۇر-سۇلتان قالاسىنىڭ اكىمدىگىنىڭ «استانالىق سيرك» كومانداسى.

تۋرنيردە جاقسى ويىن كورسەتكەن كوماندالار كۋبوكتارمەن، مەدالدارمەن جانە گراموتالارمەن ماراپاتتالدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى