جەردى جالعا بەرۋ پروتسەسى ەلەكتروندى فورماتقا كوشىرىلەدى - ەربول قاراشوكەيەۆ

بۇل تۋرالى ق ر اۋىل شارۋاشىلىعى ءمينيسترى ەربول قاراشوكەيەۆ «حابار 24» تەلەارناسىنداعى «وشاقبايەۆ Live « تىكەلەي ەفيرىندە ايتتى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، ەندى جالعا الىنعان جەردى ەكىنشى تۇلعالارعا جالعا بەرۋ مۇمكىندىگى بولادى.

«سونداي-اق، ەگەر 5 جىلدان استام اۋىلدا تۇرساڭىز، جەردى جالعا الۋعا قۇقىعىڭىز بار. قازىر جايىلىمدار تۋرالى زاڭ جوباسى ازىرلەنىپ جاتىر. بۇل زاڭ جوباسى قازىر ءماجىلىستىڭ قاراۋىندا. جاڭا زاڭعا سايكەس، پايدالانىلماي جاتقان جەردى مەملەكەت يەلىگىنە قايتارۋ مەرزىمىن قىسقارتۋ كوزدەلگەن. زاڭ قابىلدانعان جاعدايدا پايدالانىلمايتىن جەردى مەملەكەت يەلىگىنە قايتارۋ مەرزىمى 2 جىلدان 1 جىلعا دەيىن قىسقارادى»، - دەدى ە. قاراشوكەيەۆ.

ونىڭ ايتۋىنشا، جەردى جالعا بەرۋ ماسەلەسىندە مينيسترلىكتىڭ الدىندا تۇرعان باستى مىندەت - اشىقتىق پەن ادىلدىكتى قامتاماسىز ەتۋ جانە سىبايلاس جەمقورلىق كورىنىستەرىنىڭ الدىن الۋ.

سونىمەن بىرگە، مينيستر جەر ۋچاسكەلەرىن راسىمدەۋدى ەلەكتروندىق فورماتقا اۋىستىرۋ تۋرالى ايتتى.

بۇل جەردى جالعا بەرۋ پروتسەسىنىڭ اشىقتىعىن قامتاماسىز ەتۋ ءۇشىن جاسالادى. كەلەسى جىلدان باستاپ جەر ينسپەكتسياسى اۋىل شارۋاشىلىعى مينيسترلىگىنە باعىناتىن بولادى، بۇرىن ول جەرگىلىكتى اكىمدىكتەر قاراماعىندا ەدى.

ياعني، ەندى جەردى جالعا الۋ پروتسەسىن جەرگىلىكتى اكىمدىكتەر ەلەكتروندى تۇردە راسىمدەيدى، ال جەردى ءتيىمدى پايدالانۋعا رۇقسات پەن باقىلاۋدى مينيسترلىك جۇزەگە اسىرادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى