قازاقستاندا كومىرسۋتەكتەردى بارلاۋعا ارنالعان ەلەكتروندىق اۋكسيون ءوتتى
اۋكسيون قورىتىندىسى بويىنشا قول قويىلاتىن بونۋستىڭ جالپى سوماسى شامامەن 1,8 ميلليارد تەڭگەنى قۇرادى، دەپ حابارلايدى قازاقپارات.
«جەر قويناۋى جانە جەر قويناۋىن پايدالانۋ تۋرالى» ق ر كودەكسىنە سايكەس 2020-جىلعى 1- قىركۇيەكتەن باستاپ ق ر ەنەرگەتيكا مينيسترلىگى كومىرسۋتەكتەر بويىنشا جەر قويناۋىن پايدالانۋ قۇقىعىن بەرۋگە ەلەكتروندىق فورماتتا اۋكتسيون وتكىزەدى. مينيسترلىك ينتەرنەت-رەسۋرستا كومىرسۋتەكتەرگە ارنالعان جەر قويناۋىن پايدالانۋ قۇقىعىن بەرۋ بويىنشا اۋكسيون وتكىزۋ تۋرالى 2021-جىلدىڭ 18- تامىزىندا 22 جەر قويناۋى ۋچاسكەسى بويىنشا حابارلامانى ورنالاستىردى. اۋكسيوندى وتكىزۋ كۇنى 2021-جىلعى 19- قاراشاعا بەلگىلەنگەن. ەڭ از قاتىسۋشىلار سانىنىڭ بولماۋىنا بايلانىستى 8 ۋچاسكە بويىنشا اۋكتسيون توقتاتىلدى»، - دەلىنگەن اتالعان ۆەدومستۆو باسپا ءسوز قىزمەتىنىڭ مالىمەتىندە.
2021-جىلعى 19- قاراشادا ساعات 17:00 دە نۇر-سۇلتان ۋاقىتىمەن كومىرسۋتەكتەر بويىنشا جەر قويناۋىن پايدالانۋ قۇقىعىن بەرۋگە ارنالعان اۋكسيون اياقتالدى. وتكىزىلگەن اۋكسيون ناتيجەسى بويىنشا 14 جەر قويناۋى ۋچاسكەسى بويىنشا اۋكسيون جەڭىمپازدارى انىقتالدى.
14 ۋچاسكە بويىنشا قول قويۋ بونۋستارىنىڭ باستاپقى مولشەرىنىڭ سوماسى 425 ميلليون تەڭگەنى قۇرادى. اۋكسيون ناتيجەسى بويىنشا قول قويۋ بونۋسىنىڭ تۇپكىلىكتى مولشەرىنىڭ جالپى سوماسى شامامەن 1,8 ميلليارد تەڭگەگە جەتتى.
«جەر قويناۋى جانە جەر قويناۋىن پايدالانۋ تۋرالى» كودەكستىڭ 100-بابىنىڭ 3-تارماعىنا سايكەس، اۋكسيون جەڭىمپازى اۋكسيون قورىتىندىلارى جاريالانعان كۇنىنەن باستاپ جيىرما جۇمىس كۇنى ىشىندە: 1) قول قويۋ بونۋسىن تولەيدى؛ 2) قۇزىرەتتى ورگانعا قول قويىلاتىن بونۋستىڭ تولەنگەنىن راستاۋدى جانە ءوز تاراپىنان قول قويىلعان قۇزىرەتتى ورگان بەكىتەتىن كومىرسۋتەكتەردى بارلاۋعا جانە وندىرۋگە نەمەسە وندىرۋگە ارنالعان ۇلگىلىك كەلىسىمشارتقا سايكەس، ازىرلەنگەن كومىرسۋتەكتەردى بارلاۋعا ءارى وندىرۋگە نەمەسە وندىرۋگە ارنالعان كەلىسىمشارتتى جىبەرەدى.
«ەگەر اۋكسيون جەڭىمپازى كودەكستىڭ 100-بابىنىڭ 3-تارماعىندا كورسەتىلگەن مەرزىم ىشىندە قول قويىلاتىن بونۋستى تولەمەگەن نەمەسە ءوز تاراپىنان قول قويىلعان جەر قويناۋىن پايدالانۋعا ارنالعان كەلىسىمشارتتى قۇزىرەتتى ورگانعا ۇسىنباعان جاعدايدا، مۇنداي تۇلعا كەلىسىمشارت جاساسۋ قۇقىعىنان ايىرىلادى، ال جەر قويناۋى ۋچاسكەسى اۋكسيونعا قايتا شىعارىلادى.
اۋكسيون ارقىلى جەرگە مەنشىك قۇقىعى ەمەس، جەر قويناۋىن پايدالانۋ قۇقىعى بەرىلەتىنىن اتاپ ءوتۋ ماڭىزدى. بۇل قۇقىق «جەر قويناۋى جانە جەر قويناۋىن پايدالانۋ» كودەكسىمەن رەتتەلەدى، ۋچاسكەلەردەگى كەز كەلگەن تەحنولوگيالىق پروتسەستەر ق ر ەنەرگەتيكا مينيسترلىگى جانىنداعى بارلاۋ جانە يگەرۋ جونىندەگى ورتالىق كوميسسيادا قارالادى»، - دەپ اتالىپ وتكەن حابارلامادا.
جەر قويناۋىن پايدالانۋ قۇقىعىن العان ينۆەستور جەرگىلىكتى اتقارۋشى ورگانمەن جەردى جالداۋ تۋرالى شارتقا قول قويادى. جوبالاۋ قۇجاتىن ازىرلەۋ الدىندا ءاربىر جەر قويناۋىن پايدالانۋشى جەرگىلىكتى تۇرعىنداردىڭ قاتىسۋىمەن قوعامدىق تىڭداۋلار وتكىزۋگە مىندەتتى. اۋكتسيوندار ونلاين رەجيمىندە جانە جاسىرىن وتەتىندىكتەن، قاتىسۋشىلار ءبىر-ءبىرىن كورمەيدى.
بۇل اقپارات وسى اۋكسيونداردىڭ وتكىزىلۋىنە جەتەكشىلىك ەتەتىن ق ر ەنەرگەتيكا مينيسترلىگىنىڭ ماماندارى ءۇشىن دە قول جەتىمدى ەمەس. ونلاين اۋكسيون قىزمەتى 2020-جىلعى 1- قىركۇيەكتە مەملەكەتتىك مۇلىك ءتىزىلىمىنىڭ www.gosreestr.kz پورتالىندا ىسكە قوسىلدى، ونىڭ ازىرلەۋشىسى جانە يەسى - «اقپاراتتىق-ەسەپتەۋ ورتالىعى» ا ق. اۋكسيوننىڭ بارىسىن كەز كەلگەن ادام باقىلاي الادى. اۋكسيوننان تۇسكەن بارلىق قاراجات مەملەكەتتىك بيۋجەتكە باعىتتالادى.
