ۇلتتىق قۇرامادا ەل نامىسىن قورعاپ جۇرگەن ەكى دزيۋدوشى سپورتتاعى مانساپتارىن اياقتادى

ۇل تۋرالى ورالدا ءوتىپ جاتقان ەل چەمپيوناتىندا بەلگىلى بولدى، دەپ حابارلايدى قازاقپارات ق ر

ەلدوس جۇماقانوۆ ۇزاق جىلدار بويى قازاقستان كومانداسىنىڭ نامىسىن ابىرويمەن قورعاپ كەلدى. 66 كەلى سالماقتا ونەر كورسەتىپ كەلگەن ول سپورتقا بەس جاسىندا قادام باسقان. وسى جىلدار ارالىعىندا ەلدوس جۇماقانوۆ اسكەريلەر اراسىنداعى الەم چەمپيونى، گران-پري تۋرنيرىنىڭ جەڭىمپازى (2013)، اتالعان تۋرنيردىڭ كۇمىس جانە قولا جۇلدەگەرى (2016، 2019) اتاندى.

Masters تۋرنيرى (2017) مەن ەۋروپا كۋبوگىنىڭ (2015) كۇمىس جۇلدەگەرى. سونداي-اق ەلدوستىڭ جۇلدە قورجىنىندا ازيا بىرىنشىلىگىنىڭ ءتورت مەدالى بار.

ول 2015-جىلى كۋۆەيتتە، 2016-جىلى تاشكەنتتە وتكەن قۇرلىق دوداسىندا قولا جۇلدەگە قول جەتكىزسە، 2017-جىلى گونكونگ جانە 2019-جىلى فۋدجەيرادا وتكەن ازيا چەمپيوناتىندا كۇمىس مەدال تاققان.

سونىمەن قاتار، ەلدوس جۇماقانوۆ 2018-جىلى دجاكارتادا (يندونەزيا) وتكەن ازيا ويىندارىنىڭ قولا جۇلدەگەرى اتانعان.

«بۇگىن كاسىبي سپورتشى رەتىندە سپورتتاعى مانسابىمدى اياقتاپ وتىرمىن. ارينە، مۇنداي شەشىمدى قابىلداۋ مەن ءۇشىن وڭايعا سوققان جوق. دزيۋدوشى رەتىندە ۇلتتىق قۇراما ساپىندا 12 جىل تەر توكتىم. وسى جىلدار ارالىعىندا جەڭىس پەن جەڭىلىس، قيىندىق پەن قۋانىش قاتار ءجۇردى… دزيۋدو الەمىنەن تۇبەگەيلى باس تارتۋ مۇمكىن ەمەس. بۇگىن دزيۋدوشى رەتىندە سپورت مانسابىمدى اياقتاعانىممەن قازاقستان سپورتىنا قىزمەت ەتۋىمدى ءارى قاراي جالعاستىرامىن»، - دەدى ەلدوس.

گالبادراح وتگونتسەتسەگتىڭ سپورتتىق عۇمىرىنداعى ەڭ ءىرى جەڭىسى - 2016-جىلعى ريو وليمپياداسىنىڭ قولا جۇلدەسى. 48 كەلىدە ەل نامىسىن قورعاعان گالبادراح ەكى مارتە (2017، 2018) الەم چەمپيوناتىنىڭ قولا جۇلدەگەرى اتانعان. سونداي-اق ازيا ويىندارى (2018) مەن ۋنيۆەرسيادادا (2017) ۇزدىك ۇشتىككە ەنىپ، 2018-جىلى تاشكەنتتە وتكەن ازيا چەمپيوناتىندا توپ جاردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى