ءبىلىمدى، مادەنيەتتى ۇلتقا اينالۋدى باستى يدەولوگيا ەتىپ ۇستانعانىمىز ءجون – ابايەۆ

بۇل تۋرالى جامبىل جابايەۆتىڭ 175 جىلدىعىنا ارنالعان «ۇلى دالا اقىنى» اتتى حالىقارالىق كونفەرەنسيادا ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ ايتتى، دەپ حابارلايدى قازاقپارات ءتىلشىسى.

«اباي، ءسۇيىنباي، جامبىل سياقتى حالقىمىزدىڭ ءبىرتۋار پەرزەنتتەرىنىڭ اسقاق ارمانى - قازاقتىڭ ىرگەلى دە وركەنيەتتى ەل بولۋى ەدى. ەندى قازىر، تاۋەلسىزدىكتىڭ ماڭىزدى مەجەسىنە جەتكەن تۇستا ۇلتتىڭ جاڭا بولمىسىنىڭ بابالار ميراسىنا ساي كەلۋىنە ءمان بەرۋىمىز كەرەك دەپ ەسەپتەيمىن. وسى رەتتە ءال- فارابيدەن باستاپ بۇگىنگە دەيىنگى ويشىلدارىمىزعا ءتان ورتاق ۇستانىم بار. ول - ءبىلىم مەن مادەنيەت عۇرپى. قۇستىڭ قوس قاناتى بولسا، ادامدى دا بيىككە جەتەلەيتىن ەكى قاسيەت بار. ول - ءبىلىم جانە تاربيە. ءبىلىمدى دە مادەنيەتتى ۇلتقا اينالۋدى باستى يدەولوگيا ەتىپ ۇستانعانىمىز ءجون. جاڭا عاسىرداعى قازاق كەلبەتى وسى ايتىلعان ەكى قاسيەتپەن سيپاتتالۋعا ءتيىس دەپ ەسەپتەيمىن»، - دەدى پرەزيدەنت اكىمشىلىگى باسشىسىنىڭ ءبىرىنشى ورىنباسارى.

داۋرەن ابايەۆ سوڭعى كەزدە قوعامدا «يدەولوگيا جوق» دەگەن پىكىردى كوپ ەستيتىنىمىزدى اتاپ ءوتتى.

«الايدا، ءبارىمىز ءتۇسىنۋىمىز كەرەك ءبىر دۇنيە بار - قازىر بۇكىل الەم، سونىمەن بىرگە يدەولوگيا دا وزگەرگەن. كەڭەس كەزىندەگىدەي يدەولوگيا كەلمەسكە كەتتى. سەبەبى ول كەزدە اقپارات سالاسى ءبىر قولدا ەدى. ال قازىرگىدەي سيفرلاندىرۋ زامانىندا بارلىق اقپارات كوزدەرى اشىق. ءتىپتى جالعان مالىمەتتەر دە جىلدام تاراۋدا، وعان تۇبەگەيلى توسقاۋىل قويۋ مۇمكىن ەمەس. ەڭ وكىنىشتىسى، اقپاراتتىڭ اق- قاراسىن اجىراتا بىلمەيتىن ادام بۇعان سەنىپ قالىپ جاتادى. سوندىقتان وتكەنگە قارايلاي بەرمەي، ۇلتتىق ۇستىنىمىزدى ءبىلىم جانە تاربيەمەن قالاي ۇشتاستىرامىز دەپ ويلانعانىمىز ابزال»، - دەدى ول.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى