ماۋلەن اشىمبايەۆ: الداعى ءۇش جىلدىق بيۋدجەت - ۇكىمەت ءۇشىن ۇلكەن سىناق
بۇل تۋرالى ق ر پارلامەنتى سەناتىنىڭ ءتوراعاسى ماۋلەن اشىمبايەۆ ايتتى، دەپ حابارلايدى قازاقپارات ءتىلشىسى.
«ءبىز ۇلتتىق قوردان كەپىلدەندىرىلگەن ترانسفەرت تۋرالى جانە 2022-2024 -جىلدارعا ارنالعان رەسپۋبليكالىق بيۋدجەت تۋرالى زاڭ جوبالارىن قارادىق. بۇعان دەيىن سەناتتىڭ تۇراقتى كوميتەتتەرى كىرىستەر مەن شىعىستاردىڭ بارلىق باپتارىن مۇقيات زەردەلەپ، ۇكىمەت وكىلدەرىمەن بىرگە تالقىلادى. بۇگىنگى وتىرىستا دا بۇل ماسەلەلەردى جان- جاقتى قاراپ، ءتيىستى شەشىمدەر قابىلدادىق. جالپى الداعى ءۇش جىلعا ارنالعان بيۋدجەت ەلىمىزدىڭ دامۋىنداعى باسىمدىقتاردى قامتاماسىز ەتۋگە باعىتتالعان. سوڭعى جىلدارى قازاقستاندا پاندەميا سالدارىن ەڭسەرۋگە باسىمدىق بەرىلگەنى بەلگىلى»، - دەدى ماۋلەن اشىمبايەۆ سەناتتىڭ جالپى وتىرىسىندا.
ونىڭ اتاپ وتۋىنشە، مەملەكەت باسشىسىنىڭ تاپسىرماسىمەن ازاماتتارىمىز بەن زارداپ شەككەن كاسىپورىندارعا قولداۋ كورسەتۋگە قوماقتى قاراجات جۇمسالۋدا.
«جاعداي ءالى دە بولسا وڭاي ەمەس. ءبىراق، جالپى قازاقستان پاندەميا داعدارىسىن ەڭسەرىپ كەلەدى دەپ ايتۋعا بولادى. سوندىقتان الداعى ءۇش جىلدىڭ بيۋدجەتى نەگىزىنەن قايتا قالىپقا كەلۋگە جانە دامۋعا باعىتتالىپ وتىر. بيىلعى پرەزيدەنتىمىزدىڭ جولداۋىندا پاندەميادان كەيىنگى كەزەڭدە ەكونوميكانى قالپىنا كەلتىرۋدىڭ ناقتى مىندەتتەرى بەلگىلەندى. ونەركاسىپتىڭ تيىمدىلىگىن ارتتىرۋعا، وڭىرلەردى دامىتۋعا، حالىقتى الاڭداتقان وزەكتى الەۋمەتتىك ماسەلەلەردى شەشۋگە قاتىستى دا ماقسات- مىندەتتەر ايقىندالدى. پرەزيدەنتىمىزدىڭ تاپسىرماسىنا سايكەس، جاڭا مەملەكەتتىك جوسپارلاۋ جۇيەسى اياسىندا 10 ۇلتتىق جوبا ازىرلەنىپ، بەكىتىلدى. ولار ەكونوميكانىڭ وسۋىنە جانە ازاماتتارىمىزدىڭ ءومىر ءسۇرۋ ساپاسىن جاقسارتۋعا ارنالعان»، - دەدى سەنات سپيكەرى.
جوعارى پالاتا ءتوراعاسى بۇگىن قارالعان ءۇش جىلدىق بيۋدجەتتە سول جوبالاردى ىسكە اسىرۋ ءۇشىن ءتيىستى قاراجات ءبولىنىپ وتىرعانىن اتاپ ءوتتى. سوندىقتان ءار تەڭگەنى ورىندى پايدالانىپ، مەملەكەت قارجىسىنىڭ تيىمدىلىگىن ارتتىرۋ اسا ماڭىزدى ەكەندىگىن باسا ايتتى.
«جالپى، الداعى ءۇشجىلدىق بيۋدجەتتى ۇكىمەت ءۇشىن ۇلكەن سىناق دەۋگە بولادى. سەبەبى، ۇكىمەت ەكونوميكانى دامىتۋ قارقىنىن ارتتىرۋ جانە كولەڭكەلى سەكتوردى ازايتۋ ارقىلى بيۋدجەتتىڭ كىرىسىن 35 پايىزعا ءوسىرۋدى كوزدەپ وتىر. سونىمەن بىرگە بيۋدجەت تاپشىلىعىن كەزەڭ- كەزەڭىمەن تومەندەتۋ جانە ۇلتتىق قوردان بولىنەتىن ترانسفەرتتەر كولەمىن قىسقارتۋ جوسپارلانعان. بۇل ماسەلەنى سەنات دەپۋتاتتارى بۇعان دەيىن دە كوتەرگەن بولاتىن. بۇگىن ۇكىمەتتىڭ وسى باعىتتاعى بەلسەندىلىگىن بايقاپ وتىرمىز. وسىنداي باستامالاردى ءبىز، ارينە، قولدايمىز. سوعان قاراماستان مەملەكەتتىڭ بارلىق الەۋمەتتىك مىندەتتەمەلەرى تولىعىمەن ورىندالا بەرەدى»، - دەدى ماۋلەن اشىمبايەۆ.
اۆتور: مارلان جيەمباي
