ۆيتسە- مينيستر بالاسىنا ۆاكسينا سالدىرماي جۇرگەن اتا- انالارعا ۇندەۋ جاسادى

«بالالاردىڭ دەنساۋلىعى ءار اتا- انانىڭ قولىندا. بالالار جاس بولعاندىقتان، ازىرگە ءوز دەنساۋلىعى ءۇشىن شەشىم قابىلداي المايدى. ولار ءۇشىن بۇل شەشىمدى اتا- انا قابىلداۋى كەرەك. بالانى ەمدەتە مە، پروفيلاكتيكالىق شارا الا ما - ءبارى اتا- انانىڭ قولىندا. قازىر دە وسى ينفەكسيانىڭ وتە قاتەرلى ەكەنىن كورىپ وتىرسىزدار. ۋاقىتقا، مەزگىلگە بايلانىستى كوپتەگەن رەسپيراتورلىق ۆيرۋستىق ينفەكسيالاردىڭ كوپ ەكەنىن، ال ميكس سۋپەرينفەكسيانىڭ وتە قاتتى اسقىنعان تۇردە جۇرەتىنىن ايتقىم كەلەدى. سوندىقتان، مەملەكەت الەمدەگى ەڭ جاقسى، بارلىق كلينيكالىق زەرتتەۋلەردەن وتكەن، ەڭ ءتيىمدى ۆاكسينانى اكەپ وتىرعاندا، بۇل مۇمكىندىكتى پايدالانعاندارىڭىز دۇرىس»، - دەدى دەدى اجار عينيات تىلشىلەرگە بەرگەن سۇحباتىندا.

ۆيتسە- مينيستر قازاقستاندا Pfizer ۆاكسيناسىنىڭ جەتكىلىكتى قورى بار ەكەنىن، ەلدەگى بارلىق بالا سانىنا جەتكىلىكتى ۆاكسينا كەلگەنىن ايتتى.

«ارينە، بالالار ۆاكسيناتسياسى اتا- انا شەشىمىنە بايلانىستى بولعاندىقتان، ەكپەگە تۇگەل كەلمەۋى مۇمكىن ەكەنىن توپشىلادىق. ءبىراق، دەگەنمەن ەلدەگى بالالاردىڭ بارلىق سانىنا جەتەتىندەي دوزا جەتكىزىلدى. ەندى اتا- انالارمەن بىرگە بالالاردىڭ دەنساۋلىعىن قامتاماسىز ەتۋ ءۇشىن جۇمىس ىستەيمىز. مەنىڭ بۇكىل دە وتباسىم، بارلىعىمىز ۆاكسينا العانبىز. باسقا دا تۋعان- تۋىستارىم مەن دوستارىمدى كەزدەسكەن سايىن ۆاكسيناعا ۇگىتتەيمىن، الىپ تا جاتىر. حالىقتىڭ قازىر كوزى جەتتى، اۋرۋدىڭ قيىن ەكەنىن، ۆاكسينا الماعان ادامدارمەن تولعانىن كوردى، كوپتەگەن جاقىندارىن جوعالتتى. ۆاكسينانىڭ كەرەك ەكەنىن حالىق ءتۇسىندى دەپ ويلايمىز»، - دەدى ا. عينيات.

ايتا كەتەيىك، ق ر دەنساۋلىق ساقتاۋ ۆيتسە- ءمينيسترى اجار عينيات پەن سانيتارلىق- ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا بالالار ۆاكسيناتسياسىن باقىلاۋ ءۇشىن ەلوردالىق №71 مەكتەپ- ليتسەيگە باردى. قازاقستاندا 3300 بالا Pfizer ۆاكسيناسىن سالدىردى جانە ەشقايسىسىنان قاتتى جاناما اسەر بايقالعان جوق.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى