لۋكاشەنكو: زاڭسىز كەلگەن بوسقىنداردى ءوز ەلىنە قايتارامىز

ميگرانتتاردىڭ قولدانعان قارۋلارى زاتتاي ايعاقتار رەتىندە ساقتالىپ وتىر. بەلارۋس پەن پولشا شەكاراسىنداعى احۋال ۋشىعىپ بارادى. كەشە بوسقىندار پولشا اۋماعىنا شابۋىلداپ كىرمەك بولدى. ءتارتىپ ساقشىلارى ميگرانتتاردى كوز جاساۋراتاتىن گاز بەن سۋ شاشىپ توقتاتقان. ءتىپتى قاۋمالاعان جۇرت شەكارا دۋالىن بۇزىپ، پوليتسياعا شولمەك پەن تاس جاۋدىرعان. پولشا قورعانىس مينيسترلىگىنىڭ مالىمەتى بويىنشا كەيبىرەۋلەر ءتىپتى دىبىستىق گراناتالارمەن دە قارۋلانعان. رەيتەر اقپارات اگەنتتىگى بىرنەشە ءتارتىپ ساقشىسى زارداپ شەگىپ، اۋرۋحاناعا تۇسكەنىن حابارلادى. كوبىسى باسىنان جارالانعان.

اننا ميحالسكايا، پولشا شەكارا قىزمەتىنىڭ باسپا ءسوز حاتشىسى:

- ميگرانتتاردىڭ دىبىستىق گرانتالاردى لاقتىرعاندارىن كوردىك. بوسقىندار قارۋدى ءوز ەلىنەن اكەلدى دەپ ويلامايمىن. ونى بەلارۋس ەلىنەن العانى ايدان انىق. پولشانىڭ ىشكى ىستەر مينيسترلىگى بەلارۋستىڭ قارۋلى كۇشتەرى ەكى ەل اراسىنداعى قورشاۋدى بۇزباق بولعانىن ايتادى.

الەكساندر لۋكاشەنكو بولسا، ەۋرووداق ەلدەرى تاراپىنان تاعىلعان ايىپتى ەش مويىنداماي، كىرمەلەردى ادەيى بەلارۋستە جيناپ جاتپاعانىن العا تارتادى.

الەكساندر لۋكاشەنكو بەلارۋس رەسپۋبليكاسىنىڭ پرەزيدەنتى:

- الەمنىڭ تۇكپىر- تۇكپىرىنەن بوسقىنداردى جيناپ ەلگە اكەپ جاتقان جوقپىن. كەز كەلگەن مەملەكەت سياقتى بەلارۋسكە زاڭدى تۇردە كەلگەن ميگرانتتاردى قابىلداپ جاتىرمىز. ال زاڭسىز كەلگەن كىرمەلەردى ءوز ەلىنە قايتارامىز. كۇنى بۇگىنگە دەيىن 5 مىڭعا جۋىق ادام دەپارتاتسيالاندى.

ايتا كەتەيىك، قازىر پولشا شەكاراسىن 20 مىڭعا جۋىق سارباز كۇزەتىپ تۇر. كۋزنيتسا ەلدى مەكەننىڭ ماڭىنا شامامەن 4 مىڭعا جۋىق بوسقىن جينالعان. ولاردىڭ دەنى يراك، اۋعانستان مەن تاياۋ شىعىس ەلدەرىنىڭ ازاماتتارى. ميگرانتتاردىڭ ايتۋىنشا، بەلارۋس بيلىگى ولاردى كەرى قابىلداماي جاتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى