الەمگە ماسقارا بولۋ ءۇشىن ميللياردتار شاشۋدى توقتاتۋ كەرەك! - قازىبەك يسا
قازاقستان كومانداسىنىڭ فرانسيادان 8:0 بولىپ، فۋتبول تاريحىنداعى ماسقارا ەسەپپەن جەڭىلۋى ەلدىڭ قاتتى نارازىلىعىن تۋدىرۋدا.
***
باستى كىنا - باس جاتتىقتىرۋشىدا ەمەس - بىزدەگى فۋتبول جۇيەسىندە!
فرانسيادان 8:0 ەسەبىمەن ماسقارا بولىپ ۇتىلعان ۇلتتىق قۇراما فۋتبولشىلارىن ەلگە كىرگىزدى مە؟!.
اناۋ جىلى تۋىس ەل تۇركيادان 6:0 بولىپ ۇتىلعاندا جەرگە كىرىپ كەتە جازداپ ەدىك… ەندى مىناۋ فۋتبول تاريحىندا بولماعان ماسقارا جەڭىلىسكە ۇشىرادىق!؟.
گول سالمايتىن، تەك حالىق قازىناسىنا قول سالاتىن، قول سالعاندا مول سالاتىن فۋتبولعا ميللياردتتاردى شاشۋدى توقتاتۋ كەرەك، ونىڭ ورنىنا بالالار سپورتىن دامىتۋ كەرەك دەپ تالاي ماسەلە كوتەردى «اق جول» پارتياسى.
بۇگىن «قازاق ءۇنى» ۇلتتىق پورتالى باس رەداكتورى ازامات تاسقارا ۇلى «قوش بول، قازاق فۋتبولى!؟» ماقالاسىندا فۋتبولعا كەتىپ جاتقان ەسەپسىز قىرۋار قارجىنىڭ ەسەبىن جاريالادى. 2019-2020 -جىلدارى ايماقتاعى فۋتبول كلۋبتارىنىڭ وزىنە 71 ميلليارد جۇمسالعان. ال «استانا» كلۋبىنىڭ وزىنە بىلتىر 15 ميلليارد، «قايرات» كلۋبىنا 9 ميلليارد جۇمسالعان!؟.
ءبىراق ناتيجە قايدا؟!.
فرانسيا - قازاقتان 8:0
ۇياتتان ءول!!!
ءوزىمىزدى الەمگە ماسقارا ەتۋ ءۇشىن ميللياردتار جۇمساۋدى توقتاتۋ كەرەك!
بۇلاردىڭ ورنىنا تەك قازاق بالالارىنان قۇرالعان، پورتۋگالياداعى حالىقارالىق ماتچتا ەرەكشە ويىنىمەن كۋبوك جەڭىپ العان «ارلاندار» كلۋبىن (پرەزيدەنتى فازىلبەك ءابساتتار ۇلى) جىبەرۋ كەرەك ەدى…
بۇل جەردە كىنا ۇلتتىق قۇرامانىڭ باس جاتتىقتىرۋشىسى تالعات بايسۋفينوۆتا ەمەس. بۇل بىزدەگى جالپى فۋتبول فەدەراتسياسىنىڭ، فۋتبول جۇيەسىنىڭ كىناسى! ۇلتتىق قۇراما - ايسبەرگتىڭ ۇشى عانا!
شەتەلدەن لەگيونەر فۋتبولشىلار اكەلۋدى توقتاتۋ كەرەك! وتكەندە چەمپيوندار ليگاسىندا ما، قاراعاندىنىڭ «شاحتەرى» وينادى. 11 فۋتبولشىنىڭ 8- ءى شەتەلدىك، ۇشەۋى عانا قازاقستاندىق، ءبىراق قازاق ەمەس….
فۋتبول كلۋبتارىنىڭ لەگيونەرلەرگە نەگە قۇمار ەكەنى قازىر ەشكىمگە جاسىرىن ەمەس. وعان تولەنەتىن قوماقتى قارجىدان ۇلەس الىپ وتىرادى ولار.
ودان كەيىن، كەزىندە «اق جول» فراكسياسى دەپۋتاتتىق ساۋال جاساپ كوتەرگەندەي، بالالاردىڭ فۋتبول مەكتەپتەرىن دامىتۋعا جۇمساۋ كەرەك قارجىنى.
ءبىزدىڭ قازاقستان فۋتبول فەدەراتسياسىنىڭ ءبىر سوراقىلىعى، 15 جاسقا دەيىنگى قازاقستان چەمپيوناتىنا ەش ۋاقىتتاعى وڭىرلەردەگى اۋداندىق بالالار كلۋبتارى قاتىسا المايدى. سەبەبى، فەدەراتسيا ەرەجەسى بويىنشا، وڭىرلەردەگى فۋتبول كلۋبتارى رەسپۋبليكا چەمپيوناتىنا قاتىسۋ ءۇشىن سول جەردە جوعارى ليگادا وينايتىن فۋتبول كلۋبى بولۋى كەرەك ەكەن!؟. ال جوعارى ليگادا وينايتىن فۋتبول كلۋبى اۋدان تۇگىلى، قالالار تۇگىلى وبلىس ورتالىقتارىنىڭ ءوزىنىڭ بارىندە جوق قوي؟!. بۇل ەندەشە شالعايداعى شاردارانىڭ، جىراقتاعى جىمپيتىنىڭ نەمەسە شەكاراداعى نارىنقولدىڭ بالالارى ەشۋاقىتتا فۋتبول چەمپيوناتىنا قاتىسا المايدى دەگەن ءسوز. ال الىس وڭىرلەردە كىمدەر تۇرادى؟ ياعني قازاق بالالارىنىڭ فۋتبولعا جاقىنداي الماي جۇرگەنىنىڭ باستى سەبەبى وسىندا جاتىر…
«ارلاندار» كلۋبى استانامىزدا بولعاسىن جانە پرەزيدەنتى فازىلبەك ءابساتتار ۇلىنىڭ جانكەشتىلىگىنىڭ ارقاسىندا پورتۋعالياعا جەتتى…
فۋتبولدىڭ ىشىندە جۇرگەن مامانداردىڭ ايتۋىنشا، بار ماسەلە جەمقورلىق جۇيەدە دەيدى. قانشا جەردەن تالعات بايسۋفينوۆتىڭ ورنىنا زيدان، گۆارديولانى قازاقستانعا جاتتىقتىرۋشى قىلساڭ دا، قازاق فۋتبولىن دامىتىپ جىبەرە المايدى. جەمقورلىق جۇيەنىڭ اسقىنعانى سونشالىق، پەلە، مارادونا، مەسسي، رونالدۋ سەكىلدى دارىندى بالالار قازاقستاندا تۋىلسا، ولار ءسوزسىز پەلە، مارادونا، مەسسي، رونالدۋ بولا الماس ەدى. بۇل جەمقورلىق پەن سوراقى جۇيە قانشاما مەسسي مەن رونالدۋدى اۋىلدان شىعارماي ءسوندىردى ەكەن… فۋتبول باسشىلىعىنداعىلار 30 جىل بويى ميللياردتاردى جۇتىپ وتىرسا دا، «بيۋدجەتىمىز ەۋروپا دەڭگەيىنە جەتپەيدى» دەپ كەلە جاتىر. ال فازىلبەك ءابساتتار ۇلىنىڭ ايتۋىنشا، حالقىنىڭ سانى 4 ميلليون ەكونوميكاسى بىزدەن 3 ەسە كىشكەنتاي، ليگاسى 1991 -جىلى قۇرىلعان، 1995 -جىلعا دەيىن سوعىس ورتىنە ورانعان - حورۆاتيا وتكەن جىلى الەمنىڭ فۋتبول دەرجاۆالارىن كۇيرەتە وتىرىپ، الەم چەمپيوناتىندا فينالعا شىقتى. الپاۋىت فرانسيامەن تەڭ دەڭگەيدە ويىن كورسەتتى. بيۋدجەتى الەمنىڭ 50 ەلىنە كىرمەسە دە، فۋتبولىنىڭ دامۋ دەڭگەيى الەمنىڭ توپ 10-دىعىنا كىرەدى» دەيدى. ياعني، حورۆاتيا - فۋتبولدى اقشاسىز دا ويناۋعا، دامىتۋعا بولاتىنىن دالەلدەگەن ەل.
قازاق فۋتبولى دامۋ ءۇشىن الدىمەن «اۆگيدىڭ اتقوراسىن» تازالاۋىمىز كەرەك!
ول ءۇشىن قازاقستان فۋتبول جۇيەسىن جولعا قويۋ قاجەت!
قازىبەك يسا، قازاق ءۇنى
