دەپۋتات ۇلتتىق جوبالاردا ەسكەرىلمەگەن ماسەلەنى ايتتى
«ۇلتتىق جوبانى قابىلداۋ - مەملەكەتتىك جوسپارلاۋدىڭ جاڭا جانە ماڭىزدى كەزەڭى. ءبىزدىڭ تۇسىنىگىمىزدە جوسپارلاۋ ەكونوميكانى دامىتۋ جانە قازاقستاندىقتاردىڭ ءومىر ءسۇرۋ ساپاسىن جاقسارتۋ ءۇشىن ناقتى ناتيجەگە باعدارلانۋعا ءتيىس. نەگىزگى مىندەت - بۇعان دەيىنگى مەملەكەتتىك باعدارلامالاردىڭ كەمشىلىگى مەن نىسانالى ينديكاتورلاردىڭ قاتەلىگىنە جول بەرمەۋ. الايدا ءبىز مەملەكەتتىك باعدارلامالارداعى پروبلەمالار ۇلتتىق جوبالاردا دا پايدا بولىپ جاتقانىن كورىپ وتىرمىز»، - دەدى ا. قوڭىروۆ ۇكىمەت باسشىسى اسقار ءماميننىڭ اتىنا جولداعان ساۋالىندا.
ونىڭ ايتۋىنشا، سايلاۋشىلاردىڭ باسىم بولىگىندە وزدەرىنە ارناپ جازىلعان ۇلتتىق جوبالاردىڭ ءمانى تۋرالى تۇسىنىك جوق. بۇل تاڭقالارلىق جايت ەمەس، ويتكەنى ۇلتتىق جوبالار مەملەكەتتىك باعدارلامالار سەكىلدى ءىس- شارالار مەن سانداردىڭ جيىنتىعىنان قۇرالعان. ادامداردىڭ ماسەلەسىن شەشۋ جولى كورىنىس تاپپاعان.
«ەكونوميكا سالاسىنداعى جۇمىس قازاقستاندىقتاردىڭ ەكونوميكالىق قاۋىپسىزدىگىن قامتاماسىز ەتۋگە باسىمدىق بەرۋگە ءتيىس دەپ سانايمىز. جوسپارلى قۇجاتتاردا ورتاشا كورسەتكىشتەر ەمەس، ءتۇرلى سالالار مەن ازاماتتاردىڭ ساناتتارى جانە جۇمىسپەن قامتۋ سالالارى بويىنشا كىرىستىڭ قالاي ارتاتىنى مىندەتتى تۇردە كورسەتىلۋگە ءتيىس.
«قازاقستاندىقتاردىڭ ءال- اۋقاتىن ارتتىرۋعا باعىتتالعان ورنىقتى ەكونوميكالىق ءوسۋ» ۇلتتىق جوباسى مىسالىندا ازاماتتاردىڭ تابىسى قالاي ءوسىپ، ءومىرى قالاي جاقساراتىنى ناقتىلانۋى كەرەك. اتاۋىندا باسىمدىق دۇرىس بەرىلگەن.
الايدا ناقتى مىندەت دەڭگەيىندە قارايتىن بولساق، وندا بارلىق قازاقستاندىقتاردىڭ ءال- اۋقاتىن «2019 -جىلعى دەڭگەيدەن ناقتى اقشالاي كىرىس كولەمىندە % 27,1 - عا ءوسىرۋ» تۋرالى عانا مىندەت قويىلعان. نەلىكتەن % 27,1؟ نەگە % 25 نەمەسە % 30 ەمەس؟ بۇل وسىمگە قالاي قول جەتكىزىلەدى؟ بۇل وسىمگە قول جەتكىزۋ بارىسىندا ينفلياتسيا ەسەپكە الىندى ما؟ اقپارات جوق»، - دەدى دەپۋتات.
«قازاقستان حالىق پارتياسى» فراكسياسى حالىق رەسۋرسى مەن ۇلت بولاشاعىنا قاتىستى ماسەلەدە مەملەكەتتىك جوسپارلاۋعا اتءۇستى قاراۋ قاۋىپ توندىرەدى دەپ سانايدى.
«ۇلتتىق جوبالاردى جۇزەگە اسىراتىن سالالىق تۇجىرىمدامالاردى ازىرلەۋ بارىسىندا مەملەكەتتىك باعدارلامالاردا كەتكەن قاتەلەرگە جول بەرمەۋ اسا ماڭىزدى. بۇل قۇجاتتاردى ساراپشىلار مەن عىلىمي قوعامداستىق وكىلدەرى تەرەڭ تالداۋدان وتكىزۋگە ءتيىس. قۇجاتقا وزگەرىس ەنگىزۋ ءۇشىن تالقىلاۋ اشىق بولۋى كەرەك»، - دەدى دەپۋتات.
اۆتور: رۋسلان عابباسوۆ
