فۋتبول: قازاقستان قۇراماسى ەلوردادا تاجىكستاننان باسىم ءتۇستى
بۇگىنگى كەزدەسۋدە قۇرامالار ويىن باسىنان ءبىر-ءبىرىنىڭ وسال تۇبىن تابۋعا تىرىستى. العاشقى مينۋتتاردا قوناقتار شابۋىلعا كوبىرەك شىقتى. دەسە دە ۋاقىت وتە كەلە قازاقستاندىق فۋتبولشىلار تىزگىندى قولعا الۋعا كۇش سالدى.
ناتيجەسىندە 12-مينۋتتا باكتيەر زاينۋتدينوۆ تاجىكستاندىق قاقپاشىنىڭ قاتەلىگىن ءتيىمدى پايدالانىپ كەتتى.
ەكىنشى كەزەڭدە قۇرامالار تابلوداعى ەسەپتى وزگەرتۋگە تىرىستى. قوس قۇراما ويىنشىلارى ءوز مۇمكىندىكتەرىن پايدالانا العان جوق.
كەزدەسۋدە قازاقستان قۇراماسى قارسىلاسىنان 1:0 ەسەبىمەن باسىم ءتۇستى. ەكى قۇراما بۇعان دەيىن ءتورت مارتە كەزدەستى. ولاردىڭ بارلىعى جولداستىق كەزدەسۋ بولىپ تابىلادى. ءتورت كەزدەسۋدە قازاقستاندىق فۋتبولشىلار باسىمدىق تانىتسا، ءبىر ويىندا تەڭ ناتيجە تىركەلدى.
ايتا كەتەيىك، 2022-جىلعى الەم چەمپيوناتى ىرىكتەۋ ساتىسىندا قازاقستاندىق قۇراما D توبىندا سىنعا ءتۇستى. قارسىلاستارى - فرانسيا، ۋكراينا، بوسنيا جانە گەرتسوگوۆينا، فينليانديا. ۇلتتىق قۇراما نەبارى ءۇش ۇپاي جيناپ، ءوز توبىندا سوڭعى ورىندى مىسە تۇتتى.
