حالىققا يپوتەكا تولەپ، ءۇي الۋعا مۇمكىندىك بەرۋ كەرەك - ۇلتتىق كەڭەس مۇشەسى
بۇل تۋرالى ۇلتتىق قوعامدىق سەنىم كەڭەسىنىڭ مۇشەسى ۋايس ەرسايىن ۇلى ايتتى، دەپ حابارلايدى قازاقپارات ءتىلشىسى.
«الەۋمەتتىك تۇرمىسى تومەن حالىقتى الاڭداتاتىن ماسەلە - باسپانا. قازاقستاندا باسپانا كەزەگىندە 500 مىڭنان استام ادام تۇر. بۇرىن ءۇي كەزەگىنە حالىق جەرگىلىكتى اكىمدىكتەر ارقىلى تۇراتىن. 2019-جىلدان باستاپ حالىققا قىزمەت كورسەتۋ ورتالىقتارى ارقىلى كەزەككە تۇرا باستادى. ەندى ءۇي كەزەگىندە 10 جىلدان تۇرعان ازاماتتار وزدەرىن رەسپۋبليكالىق بازادان تابا الماۋدا. ولاردىڭ ىشىندە مۇمكىندىگى شەكتەۋلى ازاماتتار دا بار. وسىنىڭ كەسىرىنەن كوپتەگەن وتباسى «باقىتتى وتباسى» باعدارلاماسىمەن يپوتەكا الا المادى»، - دەدى ول ۇلتتىق قوعامدىق سەنىم كەڭەسىنىڭ 6-وتىرىسىندا.
ونىڭ اتاپ وتۋىنشە، ءۇي كەزەگىندە تۇرعان ازاماتتارعا «وتباسى» بانكى 2 پايىزبەن «باقىتى وتباسى» جانە 5 پايىزبەن «شاڭىراق» باعدارلاماسى ارقىلى يپوتەكا بەرەدى.
«بۇل ءتيىمدى باعدارلاما. باستى شارتى - ءۇي كەزەگىندە تۇرۋىڭ مىندەت. الايدا، «وتباسى» بانكى رەسپۋبليكالىق بازادا كەزەكتە تۇرعاندارعا عانا يپوتەكا بەرەدى. وسىلايشا، جەرگىلىكتى اكىمدىكتەر ارقىلى كەزەكتە تۇرعاندار ارزان يپوتەكامەن ءۇي الۋ مۇمكىندىگىنەن ايىرىلدى. ول ازاماتتاردىڭ قولىندا 10، 15 جىل كەزەكتە تۇردى دەگەن انىقتاما بار. ءمور باسىلعان، باسشىلىق قولى قويىلعان. ءبىراق، يندۋستريا مينيسترلىگى بارلىق ازاماتتى كەزەككە ەنگىزىپ ۇلگەرمەستەن «باقىتتى وتباسى» باعدارلاماسىن جاريالاپ جىبەرگەن. يندۋستريا مينيسترلىگى ءۇي كەزەگىندە تۇرعانداردى رەتتەپ، جۇيەلەۋى ءتيىس. سەبەبى 2019-جىلى ءۇي العانداردىڭ ءوزىن بازادان بيىل عانا شىعارىلعان. ياعني، 2 جىل بويى ينتەگراتسيا جاسالماعان»، - دەدى كەڭەس مۇشەسى.
ۋايس ەرسايىن ۇلىنىڭ اتاپ وتۋىنشە، ءۇي كەزەگىنە حالىق ارەندالىق باسپانا الۋ ءۇشىن عانا ەمەس، پايىزى ارزان يپوتەكا الۋ ءۇشىن دە تۇرادى.
«حالىققا وزدەرى جۇمىس ىستەپ، يپوتەكا تولەپ، ءۇي الۋعا مۇمكىندىك بەرۋ كەرەك. سونداي-اق ءۇي كەزەگىنە جالعىزباستى بولىپ تۇراتىن ادامدارعا شارتتى قايتا قاراۋ قاجەت. ءۇي كەزەگىندە جالعىزباستى بولىپ تۇرعان انا تۇرمىسقا شىقسا، كەزەكتەن شىعارىلادى. ءۇي كەزەگىنەن ايىرىلماۋ ءۇشىن ولار ەكىنشى رەت تۇرمىسقا شىقسا دا نەكەسىن زاڭداستىرمايدى. وسىلايشا، جالعان نەكە قاپتاۋدا»، - دەپ تولىقتىردى ول.
