احمەت بايتۇرسىنوۆ تۋرالى فيلم ءتۇسىرىلىپ جاتىر
كارتينا ق ر مادەنيەت جانە سپورت مينيسترلىگىنىڭ تاپسىرىسى بويىنشا ۇلتتىق كينونى قولداۋ مەملەكەتتىك ورتالىعىنىڭ قولداۋىمەن شىعارىلۋدا.
فيلم قازاقتىڭ كورنەكتى اعارتۋشىسى، قوعام قايراتكەرى جانە ساياسي پۋبليتسيست احمەت بايتۇرسىنوۆتىڭ 150 جىلدىعىنا ارنالعان.
ءتۇسىرىلىم توبىن ەرلان نۇرمۇحامبەتوۆ پەن ەرگەن توقمۋرزين باسقارادى. نۇرمۇحامبەتوۆ «جاڭعاق اعاشى» فيلمى ءۇشىن پۋسان حالىقارالىق كينوفەستيۆالى (وڭتۇستىك كورەيا) «جاڭا اعىمدار» سەكسياسىنىڭ گران-پري يەگەرى.
رەجيسسەردىڭ «ۋاقىت جولدارى» اتتى سوڭعى كارتيناسى وسى جىلى فرانسيادا پروكاتقا شىقتى. ونىڭ سەرىكتەسى ەرگەن توقمۋرزين كوپتەگەن دەرەكتى فيلمدەردىڭ قويۋشى رەجيسسەرى بولعان.
كارتينانىڭ سيۋجەتى احمەت بايتۇرسىنوۆتىڭ ءومىرىنىڭ بارلىق كەزەڭدەرىن قامتيدى. باستى رولدە - قازاقستاننىڭ ەڭبەك سىڭىرگەن قايراتكەرى ازامات ساتىبالدى.
«بۇل ۇلت ۇستازى احمەت بايتۇرسىنوۆ تۋرالى فيلم. ونىڭ ءومىرى، قوعامداعى ىستەرى جانە ەڭ باستىسى، ونىڭ كۇرەسى تۋرالى. بۇل مەملەكەتتىڭ ارنايى تاپسىرىسىمەن ءتۇسىرىلىپ جاتقان ۇلكەن جوبا. بايتۇرسىنوۆ - ءبىزدىڭ ماقتانىشىمىز. مەنىڭ ويىمشا، ءبىزدىڭ جاس ۇرپاق وسىنداي فيلمدەردى كورۋى ءتيىس. ويتكەنى، احمەت اعانىڭ جاساعان ىستەرى، الاش وردا قايراتكەرلەرىنىڭ ەرلىگى - بۇگىن كەزدەسپەيتىن باتىلدىق. سوندىقتان سول كەزدەگى وقيعالاردى زاماناۋي كورەرمەنگە كورسەتۋ كەرەك»، - دەيدى اكتەر ازامات ساتىبالدى ءتۇسىرىلىم الاڭىندا بىزگە بەرگەن سۇحباتىندا.
سونداي-اق، كارتيناعا نازگۇل قارابالينا، الەكساندر باگريانتسيەۆ جانە ەرلان كارىبايەۆ تۇسۋدە.
تۇسىرىلىمنىڭ نەگىزگى لوكاتسيالارى - الماتى قالاسى جانە شىعىس قازاقستان وبلىسى.
قويۋشى وپەراتور - مارس وماروۆ. باس پروديۋسەر - داستان اتىعايەۆ. سەناري اۆتورى - عالىم دوسكەن. جىل سوڭىنا دەيىن اۆتورلار 14 اۋىسىمدى ءتۇسىرۋدى جوسپارلاپ وتىر. فيلمنىڭ نەگىزگى بولىگى كەلەسى جىلى تۇسىرىلەدى.
