ۇلتتىق كەڭەستە پرەزيدەنت ءبىرقاتار ماسەلەگە ەگجەي-تەگجەيلى توقتالدى - ساراپشى
«بۇگىن مەملەكەت باسشىسى قاسىم-جومارت توقايەۆتىڭ قاتىسۋىمەن ۇلتتىق قوعامدىق سەنىم كەڭەسىنىڭ 6-وتىرىسى ءوتتى. پرەزيدەنت ءتۇرلى سالالارداعى ماسەلەلەرگە قاتىستى ەگجەي- تەگجەيلى توقتالدى. بۇل تۇرعىدا ۇلتتىق قوعامدىق سەنىم كەڭەسىنىڭ وسى ۋاقىتقا دەيىنگى زور ۇلەسى تۋرالى ايتىلدى. شىنىمەن دە كەڭەس بيلىك پەن ازاماتتىق قوعام اراسىندا ديالوگ الاڭىنا اينالدى. ەكى جىل ىشىندە ۇلتتىق كەڭەس مۇشەلەرىنىڭ باستامالارى بويىنشا 90 نان استام نورماتيۆتىك-قۇقىقتىق اكتى قابىلدانعان. سونىڭ اراسىندا زاڭدار، پرەزيدەنت جارلىعى مەن ۇكىمەت قاۋلىلارى، مينيسترلىكتەردىڭ بۇيرىقتارى قامتىلىپ وتىر. مەملەكەت باسشىسى رەفورمالاردىڭ باستى ماقساتىن ءتۇسىندىردى. بۇل رەتتە ءبىرقاتار ماڭىزدى باستامالاردى كوپشىلىك نازارىنا ۇسىندى»، - دەدى تولەۋتاي راقىمبەكوۆ.
وسى ورايدا ول بۇگىن پرەزيدەنت تاراپىنان ەلدى مەكەن اكىمدەرىنە قاتىستى ماڭىزدى ۇسىنىمدار بولعانىن جەتكىزدى.
«بۇدان بولەك، قاسىم-جومارت كەمەل ۇلى ءبىلىم بەرۋ سالاسىنداعى ماسەلەلەرگە قاتىستى تاپسىرمالار بەردى. بۇل باعىتتا 2025-جىلدىڭ سوڭىنا دەيىن 1 مىڭ مەكتەپ سالۋ تۋرالى تاپسىرماسىنا توقتالدى. مەملەكەت باسشىسى تۇرعىن ءۇي الاپتارى بوي كوتەرگەن كەزدە ونىمەن بىرگە مىندەتتى تۇردە مەكتەپ پەن بالاباقشا جانە باسقا دا الەۋمەتتىك نىسانداردىڭ سالىنۋى ايرىقشا نازاردا بولۋى كەرەك ەكەنىن قاداپ ايتتى. قازىرگى قۇرىلىس قارقىنىن ەسكەرسەك، بۇل ماسەلە وتە وزەكتى»، - دەدى اۋىل شارۋاشىلىعى ءمينيسترىنىڭ كەڭەسشىسى.
ونىڭ ايتۋىنشا، ۇلتتىق قوعامدىق سەنىم كەڭەسىنىڭ وتىرىسىندا سيفرلاندىرۋعا بايلانىستى ماسەلەلەر نازاردان تىس قالمادى. پرەزيدەنت اقپاراتتىق بازالاردىڭ اراسىندا بايلانىس جوق ەكەنىن سىنعا الدى.
وسىنىڭ سالدارىنان تۇرعىنداردان ءمور باسىلعان قاعاز انىقتاما قاجەت ەتەدى. بيىل حالىققا قىزمەت كورسەتۋ ورتالىقتارى وسىنداي 2 ميلليوننان استام قۇجات بەرگەن.
«مۇنىمەن قوسا، پرەزيدەنت بانكتەردىڭ كەپىل ساياساتىن جەتىلدىرۋ جانە باعالاۋ قىزمەتىن رەتتەۋ ماسەلەسىنە ارنايى توقتالدى. سونىمەن قاتار، قانداستارىمىزدىڭ ءوز اتاجۇرتىنا ورالۋ ماسەلەسى تۋرالى ەلباسى ءبىرقاتار ماڭىزدى تاريحي شەشىم قابىلداعانى بەلگىلى. 30 جىل ىشىندە 1,5 ميلليوننان استام قازاق قازاقستانعان كەلدى. بۇل رەتتە قاسىم-جومارت توقايەۆ ۇكىمەتكە ۇلى كوشتىڭ باستالۋىنا جول اشقان داتانى اتاۋلى كۇندەر كۇنتىزبەسىنە قوسۋ ماسەلەسىن قاراستىرۋدى جۇكتەدى»، - دەدى تولەۋتاي راقىمبەكوۆ.
«پرەزيدەنتتىڭ تاعى ءبىر ماڭىزدى تاپسىرماسى شەكارالاس ايماقتاردى دامىتۋعا قاتىستى بولىپ وتىر. ويتكەنى بۇل تاقىرىپ ۇلتتىق قاۋىپسىزدىككە تىكەلەي بايلانىستى. مامان رەتىندە بۇل ماسەلە مەنى دە الاڭداتىپ جۇرگەن ەدى. وزدەرىڭىز بىلەسىزدەر، شەكارا بويىنداعى ەلدى مەكەندەردەن تۇرعىندار قونىس اۋدارىپ جاتىر. سوندىقتان وسى ماسەلەگە قاتىستى مەملەكەت باسشىسى ۇكىمەتكە شەكارالاس ايماقتاردى دامىتۋ جونىندەگى ۇسىنىس ەنگىزۋدى جۇكتەدى»، - دەدى ساراپشى.
