توقايەۆ اۋىل اكىمدەرىن سايلاۋ ينستيتۋتىن جەتىلدىرۋ قاجەتتىگىن ايتتى
پرەزيدەنت كەڭەس مۇشەلەرىنىڭ تىكەلەي اتسالىسۋىمەن ەلىمىزدى ودان ءارى دەموكراتيالاندىرۋعا باعىتتالعان رەفورمالاردىڭ ءتورت توپتاماسى جاساقتالعانىن ايتتى.
«قازىر ايەلدەر مەن جاستارعا وزدەرىنىڭ الەۋەتىن ىسكە اسىرۋعا قوسىمشا مۇمكىندىكتەر بار. ءبىراق، ءبىز مۇنىمەن توقتامايمىز. ينكليۋزيۆتى قوعام قۇرۋ بارىسىندا ەرەكشە كۇتىمدى قاجەت ەتەتىن ادامداردى قامتۋ ءۇشىن مەن پارتيالاردىڭ سايلاۋ تىزىمدەرىندەگى كۆوتا ساناتتارىنىڭ سانىن كوبەيتۋدى ۇسىندىم»، - دەدى مەملەكەت باسشىسى.
قاسىم-جومارت توقايەۆ اۋداندىق ماڭىزى بار قالالاردىڭ، اۋىل، كەنت جانە اۋىلدىق وكرۋگ اكىمدەرىن تىكەلەي سايلاۋدىڭ ەنگىزىلۋى قوعامىمىزدى دەموكراتيالاندىرۋ جولىنداعى ۇلكەن قادام بولعانىن ايتتى.
بيىل ەلىمىزدە 800 دەن استام اۋىل اكىمى سايلانىپ، ناتيجەسىندە اۋىل اكىمدەرىنىڭ كورپۋسى ەكى ەسە جاڭاردى.
قازاقستان پرەزيدەنتى اۋىل اكىمدەرىن سايلاۋ ينستيتۋتىن جەتىلدىرۋ قاجەت ەكەنىن ايتتى. سونىمەن قاتار كەڭەس مۇشەلەرىنىڭ اۋىل اكىمى ۇمىتكەرلىگىنە ارناۋلى ورتا ءبىلىمى بار ازاماتتارعا رۇقسات بەرەتىن نورمانى بەكىتۋدى ۇسىنعانىنا توقتالدى.
مۇنداي جاڭاشىلدىق جەرگىلىكتى دەڭگەيدەگى سايلاۋدىڭ ءباسىن ارتتىرادى. ۇمىتكەرلەرگە، اسىرەسە ءوزىن-ءوزى ۇسىنعان ازاماتتار ءۇشىن ۇگىت- ناسيحات ۋاقىتىن ۇزارتۋ ماسەلەسى وزەكتى بولىپ وتىرعانىن، سايلاۋالدى جۇمىستاردى قارجىلاندىرۋعا سارالانعان ءتاسىل قاجەت ەكەنىن ايتىپ، اتالعان باستامالاردى زەرتتەۋدى جانە ناقتى ۇسىنىس بەرۋدى پرەزيدەنت اكىمشىلىگىنە تاپسىردى.
