قازاقستان فۋتبول فەدەراتسياسى مەملەكەت ەسەبىنەن قارجىلاندىرۋدان باس تارتتى
بۇل تۋرالى فەدەراتسيانىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
قازاقستان فۋتبول فەدەراتسياسىنىڭ باس حاتشىسى ازامات ايتحوجين 2022 -جىلعى الەم چەمپيوناتىنىڭ ىرىكتەۋ كەزەڭى اياسىندا فرانسيامەن وتكەن ءساتسىز ويىن ءۇشىن (8:0) كەشىرىم سۇرادى.
«ەڭ اۋەلى قازاقستاندىق جانكۇيەرلەردەن فرانسيامەن ويىندا ساتسىزدىككە ۇشىراعانىمىز ءۇشىن كەشىرىم سۇراعىم كەلەدى. ءار جەڭىلىستى ءبىز جان دۇنيەمىزدەن وتكەرەمىز. نەگىزگى قۇرامداعى ءبىراز فۋتبولشىنىڭ بولماۋىنا بايلانىستى، پاريجدە وڭتايلى قۇراممەن ويناۋ مۇمكىن بولمادى. بۇگىنگى تاڭدا ۇلتتىق كوماندامىزدىڭ رەزەرۆتىك قۇرامى جوق دەۋگە بولادى. كوماندا جەتەكشىلەرىن الماستىرعان ويىنشىلار ءالى حالىقارالىق دەڭگەيدە ويناۋعا دايىن ەمەس»، - دەيدى فەدەراتسيانىڭ باس حاتشىسى.
ازامات ايتحوجيننىڭ ايتۋىنشا، كەيىنگى جىلدارى قازاقستان فۋتبولىنا 100 ميلليارد تەڭگەدەن استام قارجى جۇمسالعانى تۋرالى اقپارات شىندىققا جاناسپايدى.
«جۇرتشىلىقتىڭ سىنىنا كەلەتىن بولساق، اشىق ايتايىن: بىلتىر جانە ونىڭ الدىنداعى جىلى قازاقستان فۋتبول فەدەراتسياسى مەملەكەتتىك بيۋدجەتتەن 200 ميلليون تەڭگەدەن الىپ وتىردى. ول اقشا ۇلتتىق كوماندانىڭ ءتۇرلى جاستاعى قۇرامالارىنا (U17، U19، U21 ساناتى بويىنشا، Blind-Football (زاعيپ جاندارعا ارنالعان فۋتبول)، ايەلدەر، ۇلتتىق، جاعاجاي، سونداي- اق فۋتزال قۇراماسىن حالىقارالىق جارىستارعا جۇمسالدى. قايداعى ميللياردتار تۋرالى ايتىلىپ جاتىر؟ «، - دەيدى فەدەراتسيا وكىلى.
سونداي- اق، ول كەلەسى جىلدان باستاپ قازاقستان فۋتبول فەدەراتسياسى مەملەكەتتىك جانە كۆازيمەملەكەتتىك قۇرىلىمداردىڭ قارجىسىنان باس تارتۋ تۋرالى شەشىم قابىلدانعانىن مالىمدەدى.
«ۇيىم ۋەفا- دان تۇسەتىن جانە دەمەۋشىلەردىڭ اقشاسىنان قارجىلاندىرىلادى. سوندىقتان، ۇلتتىق قۇرامانىڭ ساتسىزدىكتەرىن ءوز جارناماسى ءۇشىن پايدالانعىسى كەلەتىندەرگە ايتارىم بار. سىزدەر ەڭ بولماعاندا، ءتىل بەزەمەي تۇرىپ، پروبلەمانى تەرەڭ ءتۇسىنىپ الىڭىزدار، ماتەريالدىق بولىكتى زەرتتەڭىزدەر. ەلىمىزدە فۋتبول بار، بولعان جانە بولا بەرەدى. بىزدە فۋتبولمەن تىنىستايتىن ميلليونداعان ادام بار. ارينە، ۇلتتىق فۋتبولدىڭ دەڭگەيىن جاڭا دەڭگەيگە كوتەرۋ ءۇشىن ۋاقىت پەن جاناشىر، جانكۇيەرلەردىڭ قولداۋى كەرەك»، - دەگەن ازامات ايتحوجين جۋىقتا ۇلتتىق قۇرامانىڭ باس جاتتىقتىرۋشىسىمەن بىرگە جۇرتتى تولعاندىراتىن سۇراقتارعا جاۋاپ بەرۋ ءۇشىن سپورت جۋرناليستەرىمەن كەزدەسۋ وتكىزىلەتىنىن جەتكىزدى.
ەسكە سالساق، قاراشانىڭ 13 ىنەن 14 ىنە قاراعان ءتۇنى قازاقستان فۋتبولشىلارى 2022 -جىلعى الەم چەمپيوناتىنىڭ ىرىكتەۋ كەزەڭى اياسىندا فرانتسيا قۇراماسىمەن پاريجدە كەزدەسىپ، 8:0 ەسەبىمەن ويسىراي ۇتىلدى. قازاقستان قۇراماسى بۇعان دەيىن ەشبىر ويىندا مۇنداي ءىرى ەسەپپەن جەڭىلىپ كورمەگەن. بۇعان دەيىنگى انتيرەكورد «6:0» بولاتىن.
