نيۋ- دەليدى ءتۇتىن باسىپ قالدى، قالاداعى كولىك قوزعالىسى توقتاۋى مۇمكىن
بۇل تۋرالى قازاقپارات ANI اگەنتتىگىنە سىلتەمە جاساپ حابارلايدى.
«ءبىز جوعارعى سوتقا ەگەر لوكداۋن تەك استانالىق ايماقتا (نيۋ- دەليدەن باسقا، نويدا، فاريداباد، گازياباد، گۋرۋگرام قالالارى) ەنگىزىلسە، وعان دايىن ەكەنىمىزدى ايتتىق. اۋانىڭ لاستانۋىنا قارسى كۇرەستە بىرلەسكەن ارەكەتتەر قاجەت. ءبىز ولاردى شتات بيلىكتەرىمەن، ورتالىق بيلىكپەن بىرلەسىپ قابىلداۋعا دايىنبىز»، - دەگەن دەلي ۇكىمەتىنىڭ قورشاعان ورتانى قورعاۋ ءمينيسترى گوپال رايدىڭ سوزدەرىن كەلتىردى ANI.
اگەنتتىكتىڭ اتاپ وتۋىنشە، دەلي بيلىگى ونەركاسىپ كاسىپورىندارىنىڭ جۇمىسىن توقتاتۋ، جەكە كولىكتى پايدالانۋعا تىيىم سالۋ سياقتى شارالاردى قاراستىرىپ جاتىر. نيۋ- دەليدە كەڭسە ورتالىقتارىن جابۋ جانە قىزمەتكەرلەرىن قاشىقتان جۇمىس اتقارۋعا جىبەرۋ سياقتى شارالار دا ەنگىزىلۋى ابدەن مۇمكىن. ال بۇعان دەيىن قالادا مەكتەپتەردەگى ساباق توقتاتىلىپ، قۇرىلىس جۇمىستارىن جۇرگىزۋگە تىيىم سالىنعان ەدى.
ءۇندىستان استاناسىندا جىل سايىن كۇز مەزگىلىندەگى اۋا ساپاسىنىڭ ناشارلاۋى قالا ماڭىنداعى اق ساباقتار مەن ساباندى جاپپاي ورتەۋمەن بايلانىستى. بۇدان باسقا، ساراپشىلاردىڭ باعالاۋىنشا، قالانى قويۋ ءتۇتىننىڭ باسۋىنا اۆتوموبيلدىڭ تولاسسىز قوزعالىسى دا اسەر ەتكەن.
