رەسەيلىك ءنومىرلى كولىك ساۋداسى قىزىپ تۇر
مامانداندىرىلعان حالىققا قىزمەت كورسەتۋ ورتالىعىنىڭ تابالدىرىعىن توزدىرعان تەمىر تۇلپار يەلەرى جولدا ەمىن- ەركىن ءجۇرۋ قۇقىعىن تالاپ ەتكەن بولاتىن. ءبىراق كوبى جاعدايدى ءتۇسىنىپ، كولىگىن بىردەن ساتىلىمعا شىعارۋدى ءجون كوردى. سوڭعى اپتا ىشىندە وسىنداي حابارلاندىرۋ سانى 15 پروتسەنتكە ءوسىپ، 37 مىڭنان 42 مىڭعا دەيىن ارتتى.
ەلوردالىق بەيبارىس يسمايلوۆ بۇل كولىگىن وسىدان ءبىر جىل بۇرىن رەسەيدە ساتىپ العان. قۇنى ەلدەگى باعادان الدەقايدا تومەن بولدى، - دەيدى. ءبىراق قازاقستاندىق تىركەۋگە قويۋعا ەش اسىقپاعان. ويتكەنى كەدەندىك رەسىمدەۋ تىم قىمبات. باستاپقى تىركەۋدىڭ وزىنە 1,5 ميلليون تەڭگە سۇرايدى دەپ اشىنادى ول.
ىشكى ىستەر مينيسترلىگى رەسەيلىك ارىپتەستەرىنىڭ دەرەكتەر بازاسىمەن تانىسقاننان كەيىن كورشى ەلدىڭ تىركەۋىنەن الىنعان كولىكتەرمەن ءبىزدىڭ ەلدە دە ءجۇرۋ مۇمكىن بولماي قالدى. وسىنداي 88 مىڭ كولىكتىڭ 5 مىڭدايى ەلوردا كوشەلەرىندە ءجۇر. تۇركىستان وبلىسىندا 12 مىڭ، اقتوبەدە 10 مىڭ، قوستانايدا 8 مىڭ، اتىراۋدا شامامەن 6 مىڭ، الماتى وبلىسى مەن الماتى قالاسىن قوسا العاندا 3 مىڭداي كولىكتەگى رەسەيلىك نومەردىڭ زاڭدى كۇشى جوق. وسىعان بايلانىستى قالتانى قاعار سالىقتى تولەمەۋ ءۇشىن كوپشىلىك جاپپاي ساتۋعا كوشتى.
ەۆگەني كوبەكوۆ، حابارلاندىرۋ سايتىنىڭ شەف- رەداكتورى:
- ەكىنشى نارىقتاعى كولىكتەردىڭ جاعدايىن ۇنەمى باقىلاپ جۇرەمىز. كەدەندىك رەسىمدەۋدەن وتپەگەن تەمىر تۇلپار سانى 15 پروتسەنتكە ارتقان. ساتىلىمداعى تەحنيكانىڭ باسىم بولىگى - ۆولجسكي اۆتوموبيل زاۋىتىنىڭ ونىمدەرى. جيگۋلي، سامارا، پريورا، گرانتا سياقتى كولىكتەر سۇرانىستىڭ كوش باسىندا. ىزىنشە دەۋ، نەكسيا ماتيز ماركالارى كەلەدى. بۇلاردىڭ باعاسى قولجەتىمدى. سۇرانىستىڭ دا جوعارى بولۋى سوندىقتان.
رەسەيلىك تىركەۋدەن الىنعان كولىكتەر ساتىلىمى الداعى ۋاقىتتا تەك جوعارىلاي بەرمەك، - دەيدى حابارلاندىرۋ سايتىنىڭ ماماندارى. ءبىراق ساتىپ الۋشىلار سانى كوپ بولمايتىنى تۇسىنىكتى. باعا ودان سايىن تومەندەۋى ىقتيمال. نەمەسە قوسالقى بولشەك رەتىندە ساتۋدان باسقا امال قالمايدى. پوليتسيا قىزمەتكەرلەرىنىڭ ايىپپۇلى مەن ايىپتۇراعىنان ساقتانعاندار وسىنداي قادامعا بارۋعا ءماجبۇر بولماق.
ەدۋارد ەدوكوۆ، تاۋەلسىز اۆتوموبيل وداعىنىڭ باسشىسى:
- كولىكتى بولشەكتەپ ساتۋ كەزىندە كوپ ماسەلە تۋىنداي قويمايدى. ەسىگىن، كاپوتىن، قوزعالتقىشىن بولەك ساتۋدان ۇتىلمايسىز. قازىرگى پاندەميا سالدارىنان تۋىنداعان لوگيستيكالىق ماسەلەلەر اياسىندا تۇتىنۋشىلار كولىگىنە قاجەت قوسالقى بولشەكتى الىسقا بارماي جاقىننان ساتىپ العىسى كەلەدى. سوندىقتان بۇل مۇمكىندىكتى قولدانىپ قالۋ كەرەك. ءبىراق وتاندىق نارىقتا كولىككە ارنالعان قوسالقى بولشەكتەر كوپتەپ جەتكىزىلسە دە، باعانىڭ تومەندەۋى ەكىتالاي، - دەيدى ساراپشىلار.
www.24.kz
