قىتاي تاراپى قازاقستان ايماعىندا تۇرىپ قالعان جۇكتەردى قابىلدايدى
ق ر قارجى مينيسترلىگى مەملەكەتتىك كىرىستەر كوميتەتىندە قازاقستان مەن قىتايدىڭ مۇددەلى مەملەكەتتىك ورگاندارى اراسىنداعى COVID-19 جاعدايىندا قازاقستان- قىتاي شەكاراسىنداعى وتكىزۋ پۋنكتتەرىنىڭ جۇمىس ىستەۋى تۋرالى وتكەن كەلىسسوزدەردىڭ ناتيجەسى تۋرالى حابارلاندى.
2021 -جىلدىڭ 11-قاراشاسىندا قازاقستان رەسپۋبليكاسى (ق ر) مەن قىتاي حالىق رەسپۋبليكاسىنىڭ (ق ح ر) مۇددەلى مەملەكەتتىك ورگاندارى اراسىندا COVID-19 جاعدايىندا قازاقستان- قىتاي شەكاراسىنداعى وتكىزۋ بەكەتتەرىنىڭ جۇمىس ىستەۋى تۋرالى كەلىسسوزدەر جۇرگىزىلدى. قازاقستاندىق دەلەگاتسيانى قازاقستان رەسپۋبليكاسى قارجى ۆيتسە- ءمينيسترى م. سۇلتانعازيەۆ، قىتايلىق تاراپتى – ق ح ر شىڭجاڭ- ۇيعىر اۆتونوميالىق اۋدانى حالىق ۇكىمەتى ءتوراعاسىنىڭ ورىنباسارى ليۋ سۋشە باسقاردى. ءىس- شاراعا قازاقستان رەسپۋبليكاسى سىرتقى ىستەر، دەنساۋلىق ساقتاۋ، يندۋستريا جانە ينفراقۇرىلىمدى دامىتۋ، ساۋدا جانە ينتەگراتسيا، اۋىل شارۋاشىلىعى مينيسترلىكتەرىنىڭ، ق ر ۇلتتىق قاۋىپسىزدىك كوميتەتىنىڭ شەكارا قىزمەتى، «ۇ ق ق ت ج» اق وكىلدەرى، سونداي- اق ق ح ر شىڭجاڭ- ۇيعىر اۆتونوميالىق اۋدانىنىڭ مۇددەلى مەملەكەتتىك ورگاندارىنىڭ باسشىلارى قاتىستى. كەلىسسوزدەر بارىسىندا تاراپتار كولىكتىك- كوممۋنيكاتسيالىق ءوزارا بايلانىستى جانە ايماقارالىق بايلانىستاردى نىعايتۋعا، ساۋدا- ەكونوميكالىق ىنتىماقتاستىقتىڭ ساپاسىن ارتتىرۋعا جاردەمدەسۋگە باعىتتالعان بۇرىن جوعارى دەڭگەيدە قول جەتكىزىلگەن ۋاعدالاستىقتاردى ۇستاناتىندىقتارىن راستادى. كەلىسسوزدەر ناتيجەسىندە تاراپتار قازاقستان- قىتاي مەملەكەتتىك شەكاراسىنىڭ اۆتوموبيل جانە تەمىرجول وتكىزۋ بەكەتتەرىندە وتكىزۋ قابىلەتىن ارتتىرۋ، اۆتوكولىك قۇرالدارى مەن جۇكتەرگە قاتىستى ەپيدەمياعا قارسى ءىس- شارالار جۇرگىزۋ بويىنشا بىرلەسكەن شارالار قابىلداۋ تۋرالى ۋاعدالاستى.
قىتاي تاراپى قىتايلىق تاراپتاعى «قالجات» - «دۋلاتى» وتكىزۋ بەكەتىنىڭ جۇمىسىن قالپىنا كەلتىرۋ ءۇشىن وتكىزۋ پۋنكتىنىڭ ەپيدەمياعا قارسى قاۋىپسىزدىگىن قامتاماسىز ەتۋ ءۇشىن قوسىمشا قۇرىلىس جۇمىستارى جۇرگىزىلۋى كەرەك ەكەنىن اتاپ ءوتتى. بۇل رەتتە ق ح ر ش ۇ ا ا حالىق ۇكىمەتى سانيتارلىق - ەپيدەميولوگيالىق باقىلاۋدىڭ قاتاڭ شارالارى ساقتالعان جاعدايدا قازاقستان- قىتاي شەكاراسىنداعى «مايقاپشاعاي» - «زيمۋناي» اۆتوموبيل وتكىزۋ بەكەتىنىڭ قىزمەتىن قالپىنا كەلتىرۋگە دايىن ەكەندىگىن حابارلادى. سونىمەن قاتار، قىتاي تاراپى جاقىن ارادا ق ر باعىتىنداعى تەمىرجول قۇرامدارىنىڭ سانىن ارتتىرۋ جانە قازاقستاندىق تاراپتا تۇرىپ قالعان جۇكتەردى قابىلداۋ نيەتىن راستادى.
