كوشپەندىلەر ىزىمەن: تارازدان كيەلى تۇركىستانعا كەرۋەن اتتاندى
جامبىل وبلىسىنىڭ تۇركىستانداعى كۇندەرى اياسىندا «ۇلى جىبەك جولى. تاريح قويناۋىنان - تۇركىلەر بەسىگىنە» اتتى كوش تۇزەگەن كەرۋەندى شىعارىپ سالۋ سالتاناتى قازاق حاندىعىنىڭ تۋىن تىكتەگەن كەرەي مەن جانىبەك حانداردىڭ مونۋمەنتى الدىندا ءوتتى. شاراعا زيالى قاۋىم وكىلدەرى، ونەر يەلەرى، قالا تۇرعىندارى مەن قوناقتارى قاتىستى.
«تاراز - تاريحىمىزدىڭ تەمىر قازىعى»- دەپ، ەلباسى نۇرسۇلتان نازاربايەۆ ايتقانداي، تاريح تەرەڭىنەن تامىر الاتىن رۋحاني مۇرامالارىمىزدى جاس ۇرپاققا دارىپتەپ، اماناتتاۋ بۇگىنگى كۇننىڭ مەرەيلى مىندەتى. شارانىڭ باستى ماقساتى - XX عاسىردىڭ باسىنا دەيىن ساقتالىپ كەلگەن كەرۋەن جولىن جاڭعىرتۋ، قىتاي، قازاقستان جانە ورتالىق ازيانىڭ قالالارى مەن ەلدى مەكەندەرىن بايلانىستىرىپ وتىرعاندىعىن كورسەتۋ، جاھاندىق وركەنيەت اياسىندا ۇلتتىق بىرەگەيلىكتى ساقتاۋدىڭ جولدارى رەتىندە ۇلتتىق مادەنيەت، ۇلتتىق ءداستۇردى ساقتاۋ، جاڭعىرتۋ، تارازدىڭ ورتالىق ازياداعى ەڭ كونە قالالارىنىڭ ءبىرى ەكەندىگىن ايشىقتاۋ ءتۇسۋ.
كوشتى شىعارىپ سالۋ بارىسىندا كەنەن ازىربايەۆ اتىنداعى وبلىستىق فيلارمونيانىڭ ونەرپازدارى اننەن شاشۋ شاشسا، اسقار توقپانوۆ اتىنداعى وبلىستىق قازاق دراما تەاترىنىڭ شىعارماشىلىق ۇجىمى تەاترلاندىرىلعان قويىلىمدى كوپشىلىك نازارىنا ۇسىندى.
وسىلايشا، قازاقى داستۇرمەن اق باتا بەرىلىپ، مادەني، رۋحاني كەرۋەن بابالار ىزىمەن تۇركىستان جەرىنە اتتاندى. اتتانعان كەرۋەن- كۇيمەنىڭ قۇرامىندا 10 تۇيە، 6 بوتا، 20 ات، 3 ات اربا، 1 كەرۋەن باسى، 1 جىرشى، 1 باتىر، 14 قىز- جىگىت بار. وبلىس اكىمىنىڭ باستاماسىمەن، مادەنيەت، ارحيۆتەر جانە قۇجاتتاما باسقارماسىنىڭ ۇيىتقى بولۋىمەن ۇيىمداستىرىلىپ جاتقان ءوڭىرارالىق مادەنيەت كۇندەرى اياسىندا تاعىلىمدى شارالار دا كوپشىلىكتىڭ نازارىنا ۇسىنىلاتىن بولادى.
ايتا كەتسەك، جامبىل وبلىسىنىڭ تۇركىستان وبلىسىنداعى كۇندەرى اياسىندا ەكى كۇن بويى «تاراز - ۇلى دالانىڭ كونە شاھارى» اتتى جىلجىمالى كورمە، وبلىستىق كىتاپحانالاردىڭ «وتكەنى - ونەگە، بۇگىنى - بەكەم، بولاشاعى - جارقىن جامبىل ءوڭىرى» اتتى جىلجىمالى مادەني شاراسى، «تارازدان تۇركىستانعا شاشۋ» اتتى مەرەكەلىك كونسەرتى ۇيىمداستىرىلماق.
