ىستانبۇلدا تۇركى كەڭەسىنىڭ ءسامميتى وتەدى
«سيفرلىق داۋىردەگى جاسىل تەحنولوگيالار مەن اقىلدى قالالار» تاقىرىبىنا ارنالعان سامميتكە قازاقستان، ازەربايجان، قىرعىزستان، وزبەكستان جانە تۇرىكمەنستان پرەزيدەنتتەرى، سونداي-اق ماجارستان پرەمەر-ءمينيسترى مەن تۇركى كەڭەسىنىڭ باس حاتشىسى قاتىسادى دەپ جوسپارلانۋدا. مەملەكەت باسشىلارى ۇيىمنىڭ ورتا مەرزىمدى جانە ۇزاق مەرزىمدى پەرسپەكتيۆالارىنا قاتىستى ءبىرقاتار ماڭىزدى ماسەلەلەردى تالقىلايدى. بۇگىن، ءوز كەزەگىندە، قاتىسۋشى ەلدەردىڭ سىرتقى ىستەر مينيسترلەرىنىڭ كەڭەسى سامميت اياسىندا قول قويىلاتىن تۇپكىلىكتى كۇن ءتارتىبى مەن قۇجاتتاردى دايىندايدى.
ەسكە سالساق، قازاقستان پرەزيدەنتى قاسىم-جومارت توقايەۆ تۇركىتىلدەس مەملەكەتتەردىڭ ىنتىماقتاستىق كەڭەسىنىڭ VIII سامميتىنە قاتىسۋ ءۇشىن ەكى كۇندىك جۇمىس ساپارىمەن ىستانبۇل قالاسىنا كەلدى.
