باعدات مۋسين ەمتيحانسىز جۇرگىزۋشى كۋالىگىن الۋ ەكسپەريمەنتتىڭ ناتيجەسىن ايتتى
«ءتيىستى كوميسسيا شەشىم قابىلدايدى. مينيستر رەتىندە «ازاماتتارعا ارنالعان ۇكىمەتكە»، ياعني وسى پروتسەستەرمەن اينالىساتىن كومپانياعا بارلىق قاجەتتى شارالاردى قابىلداۋعا كەڭەس بەردىم. ەكسپەريمەنتتىك تەكسەرۋمەن ءوزىم بارعان مامانداندىرىلعان حالىققا قىزمەت كورسەتۋ ورتالىعىنىڭ باسشىسى جۇمىستان بوساتىلىپ، جاڭا قىزمەتكەر تاعايىندالدى»، - دەدى ب. مۋسين سەناتتا تىلشىلەر ساۋالىنا جاۋاپ بەرە وتىرىپ.
وسى ورايدا ول مامانداندىرىلعان ح ق ك و- لارداعى وسى تەكتەس زاڭسىزدىقتارعا الداعى ۋاقىتتا دا توسقاۋىل قويىلاتىنىن ايتتى.
«ءبىز مەملەكەتتىك قىزمەتتى جىلدام فورماتتا جانە جەمقورلىق جاعدايىنا جول بەرمەيتىن قادامدارمەن ۇسىنۋىمىز كەرەك. زاڭناماداعى پروتسەستەر قاتاڭ ورىندالۋى كەرەك. ول ءۇشىن تەحنولوگيالىق يننوۆاتسيالاردى ەنگىزەمىز، ياعني بيومەتريا مەن ەمتيحان تاپسىرۋشىنى بايقاپ وتىراتىن تەحنولوگيالار ەسكەرىلەدى»، - دەدى مينيستر.
بۇدان بۇرىن باعدات مۋسين ءوزى ۇيىمداستىرعان ەكسپەريمەنتتى Instagram-دا جاريالاعان ەدى. وندا مينيستر ەلورداداعى مامانداندىرىلعان حالىققا قىزمەت كورسەتۋ ورتالىعىندا ەمتيحانسىز جۇرگىزۋشى كۋالىگىن الۋ ءۇشىن ۋاعدالاسۋى ءساتىن تۇسىرگەن ەدى. كەيىنەن ۆەدومستۆو باسشىسى جۇرگىزۋشى كۋالىگىن الۋعا ەمتيحاننان سۇرىنبەي وتەتىندەر سانى كۇرت ازايعانىن جازدى.
اۆتور: رۋسلان عابباسوۆ
