ون ەكى جاسقا دەيىنگى بالالاردى اتا-انا كەلىسىمىمەن ۆاكسينالاۋعا بولا ما - مينيسترلىك جاۋابى

ماماننىڭ ايتۋىنشا، قازىر قازاقستاندا بالالارعا تەك 12 جاستان باستاپ ەكپە جاساۋعا رۇقسات ەتىلگەن. «قازىرگى ۋاقىتتا قازاقستان رەسپۋبليكاسىندا قولدانىلاتىن جانە تىركەلگەن نۇسقاۋلىققا، ياعني Comirnaty Pfizer نۇسقاۋلىعىنا سايكەس، 12 جاستان باستاپ ۆاكسينا جۇرگىزىلەدى. ءبىراق بۇل ءوندىرۋشى كومپانيا قازىر امەريكادا بالالاردى 5 جاستان باستاپ ۆاكسينالاۋدى باستادى. ياعني سول Pfizer، ءبىراق 5 جاسار بالالار ءۇشىن باسقا دوزا قولدانىلادى. ەگەر ءوندىرۋشى ءبىزدىڭ ورگانعا ءتيىستى قۇجاتتاردى ەنگىزسە، ياعني تىركەۋ ءۇشىن دارىلىك زاتتاردى ەكسپەرتيزالاۋ ۇلتتىق ورتالىعىنىڭ نۇسقاۋلىعىنا «5 جاستان باستاپ ۆاكسينالاۋدى» ەنگىزسە، بۇل بالالاردى 5 جاستان ۆاكسينالاۋعا مۇمكىندىك بەرەدى. ءبىراق قازىر بەكىتىلگەن نۇسقاۋلىق تەك 12 جاستان باستاپ ۆاكسينالاۋعا رۇقسات ەتەدى»، - دەپ ءتۇسىندىردى ايجان ەسماعامبەتوۆا ۇكىمەت وتىرىسىنان كەيىن جۋرناليستەرگە.

كوميتەت ءتوراعاسىنىڭ ايتۋىنشا، ۆاكسينالاۋ ءۇشىن جاس ساناتىنىڭ كەڭەيۋىن ۆاكسينا وندىرۋشىلەر كلينيكالىق زەرتتەۋلەر اياسىندا انىقتايدى.

«ەگەر ءوندىرۋشى كلينيكالىق زەرتتەۋلەردەن ناتيجە السا، تيىسىنشە وسى وزگەرىستەردى نۇسقاۋلىققا ەنگىزەدى. نۇسقاۋلىق ءبىزدىڭ زاڭناماعا سايكەس قازاقستاندا تىركەلۋى ءتيىس. سودان كەيىن عانا بۇل بىزگە ۆاكسينانى قولدانۋعا مۇمكىندىك بەرەدى. مىسالى، قىتايداعى Sinopharm قازىردىڭ وزىندە 3 جاستان اسقان بالالارعا قولدانىلادى. قازاقستاندا بۇگىنگى كۇنى تەك 12 جاستان باستاپ Pfizer ۆاكسيناسىن ەگۋگە بولادى»، - دەپ ناقتىلادى ا. ەسماعامبەتوۆا.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى