نۇر-سۇلتاندا ءتارتىپ ساقشىلارىنىڭ وقۋشىلارمەن جۇمىس ىستەۋىنە قاتىستى جاڭا ءادىس ازىرلەنىپ جاتىر
بۇگىندە جۇمىس ىستەۋدىڭ جاڭا ءادىسى ازىرلەنۋ ۇستىندە. بۇل تۋرالى نۇر-سۇلتان قالاسى پوليتسيا دەپارتامەنتى باسشىنىڭ ءبىرىنشى ورىنباسارى باقىتجان مالىبايەۆ ءمالىم ەتتى، دەپ حابارلايدى قازاقپارات ءتىلشىسى.
«جۋىردا ەلوردانىڭ مەكتەپ ديرەكتورلارىنىڭ قاتىسۋىمەن ونلاين جيىن وتكىزدىم. وسى تۇستا ايتارىم، وقۋشىلار اراسىندا بولاتىن ءتۇرلى بۇزاقىلىق، بوپسالاۋ، الەمجەتتىك كورسەتۋ ماسەلەسى بويىنشا ءبىز مەكتەپ پسيحولوگتارىمەن بىرلەسىپ ارەكەت ەتپەكپىز. ول ءۇشىن قازىر ءبىلىم باسقارماسىمەن بىرلەسىپ وقۋشىلارمەن جۇمىس ىستەۋدىڭ جاڭا ءادىسىن ازىرلەپ جاتىرمىز. بۇعان دەيىن قالاي بولدى، ءبىر جاعداي بولسا ۋچاسكەلىك پوليتسيا مەكتەپكە بارادى، ول وقۋشى ونىڭ الدىندا قىزارىپ نەمەسە اقتالىپ تۇرادى. وسى ورايدا جاڭا ادىسپەن جۇمىس ىستەۋدىڭ ەكى ماقساتى بار. بىرىنشىدەن، وقۋشى پوليتسەيدەن قورىقپاۋى ءتيىس جانە پوليتسيا دەگەندە جازالايتىن ادام دەگەن تۇسىنىك قالىپتاسپاۋى كەرەك. ەكىنشىدەن، جاس وسپىرىمدەرمەن جۇمىس ىستەۋدىڭ مەتوديكاسىن مەڭگەرگەن ءجون، بۇل جەردە الدىمەن بالامەن ءتىل تابىسۋ ماڭىزدى»، - دەدى باقىتجان مالىبايەۆ.
بۇعان دەيىن حابارلاعانىمىزداي، بۇگىن نۇر-سۇلتان قالاسىندا زاماناۋي سەرۆيستىك پوليتسيا قىزمەتىنىڭ جۇمىسى تانىستىرىلدى. سونداي-اق، اتالعان شارادا ەلوردادا ۋچاسكەلىك پوليتسيا قىزمەتكەرلەرى سانىنىڭ ارتقانى ايتىلدى.
