ماجارستاندا كوكپار جانە ۇلتتىق سپورت تۇرلەرى قاۋىمداستىعى قۇرىلدى
«ماجار-تۇران» قورىنىڭ قولداۋىمەن قۇرىلعان قاۋىمداستىق ءداستۇرلى سپورت تۇرلەرىن جۇيەگە كەلتىرىپ، بۇقارالىق سيپات بەرۋدى ماقسات تۇتادى. سونىمەن قاتار ۇلتتىق سپورت تۇرلەرىمەن اينالىساتىن بىرلەستىكتەر مەن فەدەراتسيالاردىڭ جۇمىسىن كاسىبي دەڭگەيگە كوتەرىپ، ولاردىڭ اراسىندا ارىپتەستىك بايلانىس ورناتۋ كوزدەلگەن.
ماجارستانداعى كوكپار جانە ۇلتتىق سپورت تۇرلەرى قاۋىمداستىعىنىڭ وكىلى زولتان ۆارگانىڭ ايتۋىنشا، قاۋىمداستىق ۇلتتىق سپورتتان سايىستار، حالىقارالىق تۋرنير مەن الەم چەمپيوناتتارىن ۇيىمداستىرىپ، تۇركى حالىقتارى سپورتىنا الەم ەلدەرىنىڭ قىزىعۋشىلىعىن ارتتىرۋعا سەپتىگىن تيگىزبەك.
سونىمەن قاتار ول ۇلتتىق سپورت تۇرلەرى اراسىندا كوكپاردىڭ ماڭىزدى ەكەنىن ەرەكشە اتاپ ءوتتى.
«بۇل - ورتالىق ازيانىڭ بارلىق دەرلىك ەلدەرىندە ەرەكشە ورنى بار جانە ⅩⅩ عاسىردىڭ ورتاسىنا دەيىن ماجارستاندا دا وينالىپ كەلگەن كوشپەندىلەر ويىنى» - دەيدى ول.
قاۋىمداستىق قۇرامىنا 12 سپورت ءتۇرى بويىنشا بىرلەستىك ەنىپ وتىر. ونىڭ ىشىندە بۇركىتشى، كوكپار، ات ۇستىنەن ساداق اتۋ، نايزالاسۋ، كۇرەس، ساۋىتتى اسكەردىڭ (قارۋلى) جەكپە جەگى بويىنشا سپورت بىرلەستىكتەرى بار.
بۇگىندە ۇلتتىق سپورتقا دەگەن قىزىعۋشىلىق ارتىپ كەلەدى. ويتكەنى، ەتنوسپورت - ءار ۇلتتىڭ وزىندىك ەرەكشەلىگىن، ءداستۇرى مەن مادەنيەتىن كورسەتەتىن قۇرال.
«الەمدە ءجۇرىپ جاتقان ساياسي، ەكونوميكالىق، ەكولوگيالىق جانە مادەني پروتسەستەر اياسىندا، كوشپەندى حالىقتىڭ قۇندىلىعى، مۇراسى مەن داستۇرىنە جۇگىنىپ، تەگىمىزدى تانىپ، ءبىلۋدىڭ ماڭىزى زور»، - دەيدى ۇيىمداستىرۋشىلار.
اتاپ وتەيىك، قاۋىمداستىق بيىل ماجارستانداعى «ساداقشىلار جولى» مەكتەبىمەن بىرلەسىپ، كوشپەندى حالىقتاردىڭ ۇلتتىق سپورت تۇرلەرىنە ارنالعان حالىقارالىق چەمپيونات ۇيىمداستىردى.
سپورتشىلار ات جارىس، جەكپە-جەك، ساداق اتۋ، سەمسەرلەسۋ سىندى كوشپەندىلەر ويىندارىنىڭ ون تۇرىنەن ونەر كورسەتتى.
سونداي-اق كەلۋشىلەر ماجارلاردىڭ سۇڭقار ۇشىرۋ ءداستۇرىن تاماشالاپ، كوشپەندىلەر تۇرمىسى تاقىرىبىنداعى فوتوكورمە، كيىز ءۇي جابدىقتارى مەن قارۋ-جاراق تۇرلەرىمەن تانىستى. ماجارستاننىڭ كوكپار جانە ۇلتتىق سپورت تۇرلەرى قاۋىمداستىعى تۇركيانىڭ بۇكىل الەمدىك ەتنوسپورت كونفەدەراتسياسىمەن ارىپتەستىك قاتىناس ورناتىپ، قىركۇيەك ايىندا ەۋروپا وداعىنىڭ جاستار كوشباسشىلارى مەن جاستار اراسىندا ءداستۇرلى سپورت ويىندارى مەن ادامزاتتىڭ مادەني مۇراسىنىڭ داستۇرلەرىن ناسيحاتتاۋ جوباسىنا قاتىستى.
