ەلوردادا ۋچاسكەلىك پوليتسەيلەردىڭ سانى ارتتى
بۇل تۋرالى نۇر-سۇلتان قالاسى پوليتسيا دەپارتامەنتى باسشىنىڭ ءبىرىنشى ورىنباسارى باقىتجان مالىبايەۆ ءمالىم ەتتى، دەپ حابارلايدى قازاقپارات ءتىلشىسى.
«قالا بويىنشا 37 ۋچاسكەلىك پوليتسيا بەكەتى بار. ونىڭ ەكەۋى بۇگىندە جوندەلىپ جاتىر. ىشكى ىستەر ءمينيسترىنىڭ بۇيرىعىنا سايكەس، ءاربىر 14800 ادامعا ءبىر ۋچاسكەلىك پوليتسيا بەكەتىنەن كەلۋى ءتيىس. بۇگىندە ەلوردا حالقىنىڭ سانى 1 ميلليوننان استى، استانالىقتاردىڭ قاۋىپسىزدىگىن قامتۋ ءۇشىن قالا بويىنشا 76 ۋچاسكەلىك پوليتسيا بەكەتى بولۋى كەرەك. بيىل ەلوردادا ۋچاسكەلىك پوليتسيالاردىڭ سانى 108 گە ارتتى. جالپى سانى قالا بويىنشا 417 ۋچاسكەلىك پوليتسيا ەڭبەك ەتىپ جاتىر. ەندى تاعى 150 دەي ۋچاسكەلىك پوليتسيا قابىلدانسا ەلوردا بويىنشا پرەزيدەنتتىڭ قولجەتىمدى پوليتسيا تاپسىرماسى تولىقتاي ورىندالادى. وزدەرىڭىز بىلەسىزدەر، ەلوردا حالقىنىڭ سانى كۇن ساناپ ارتىپ كەلەدى، تيىسىنشە قاۋىپسىزدىكتى قامتۋدىڭ جاۋاپكەرشىلىگى دە ارتا تۇسەدى»، - دەدى باقىتجان مالىبايەۆ.
بۇعان دەيىن حابارلاعانىمىزداي، بۇگىن نۇر-سۇلتان قالاسىندا زاماناۋي سەرۆيستىك پوليتسيا بەكەتىنىڭ جۇمىسى تانىستىرىلدى.
