جازۋشىلار وداعىنىڭ تۇركىستان وبلىستىق فيليالىنا ءتوراعا سايلاندى
تۇركىستاندا اقىن-جازۋشىلاردىڭ «تۇركىستان - تاۋەلسىزدىك تۇعىرىندا» اتتى كەزدەسۋى ءوتتى.
رۋحاني ماڭىزى بار باس قوسۋعا قازاقستان جازۋشىلار وداعى باسقارماسىنىڭ ءتوراعاسى، اقىن ۇلىقبەك ەسداۋلەت، ءتوراعا ورىنباسارلارى - جازۋشى مەرەكە قۇلكەنوۆ، اقىن اقبەرەن ەلگەزەك جانە قازاقستان جازۋشىلار وداعى باسقارماسىنىڭ حاتشىسى، اقىن قاسىمحان بەگمانوۆ باستاعان رەسپۋبليكانىڭ جانە تۇركىستان وبلىسىنىڭ قالامگەرلەرى قاتىستى.
جيىندى تۇركىستان وبلىسى اكىمىنىڭ ورىنباسارى ساكەن قالقامانوۆ جۇرگىزىپ وتىردى.
تاۋەلسىزدىك مەرەكەسىنىڭ 30 جىلدىعىن تۇركىستان ءوڭىرى تولايىم تابىستارمەن، وڭ وزگەرىستەرمەن قارسى الىپ وتىرعانىن ايتقان ول، شاھاردى دامىتۋدا اقىن-جازۋشىلارعا دا ارتىلار جۇك از ەمەس ەكەنىن جەتكىزدى.
وبلىس اكىمى ءومىرزاق شوكەيەۆتىڭ اتىنان جازۋشى مەرەكە قۇلكەنوۆتىڭ 70 جىلدىعىنا ارنالعان قۇتتىقتاۋ حاتى مەن سىي-سياپاتىن تاپسىردى. سونىمەن بىرگە جازۋشىلار وداعىنىڭ ءتوراعاسىنىڭ يىعىنا دا شاپان جابىلدى.
قازاقستان جازۋشىلار وداعى باسقارماسىنىڭ ءتوراعاسى، اقىن ۇلىقبەك ەسداۋلەت وداقتىڭ تىنىس-تىرشىلىگى مەن جوسپارلارى تۋرالى ايتىپ بەردى.
جاڭا تىنىسى اشىلعان تۇركىستاننىڭ ادەبيەتى دە ءوز بيىگىنەن تۇسپەي، وڭىرمەن بىرگە وركەندەۋى ءتيىس ەكەنىن جەتكىزدى.
جيىندا تۇركىستان ءوڭىرىنىڭ 13 قالامگەرىنە قازاقسان جازۋشىلار وداعىنىڭ مۇشەلىگىنە قابىلدانعانى جونىندەگى كۋالىكتەرى تاپسىرىلدى. ولاردىڭ اراسىندا جالىندى جاستار دا، ورتا بۋىن وكىلدەرى دە بار. سونىمەن بىرگە وبلىس اقىن-جازۋشىلارى مەن جازۋشىلار وداعى باسشىلىعىنىڭ قولداۋىمەن ايدار سەيدازىم قازاقستان جازۋشىلار وداعى تۇركىستان وبلىستىق فيليالىنىڭ ءتوراعاسى بولىپ سايلانىپ، بۇيرىعى جۇرتشىلىققا تانىستىرىلدى.
قالامگەرلەردىڭ كەلەلى كەڭەسىندە ادەبيەتكە قولداۋ كورسەتۋ، ءوڭىردىڭ رۋحاني الەۋەتىن كوتەرۋ، جاس اقىن-جازۋشىلاردىڭ شەبەرلىگىن شىڭداۋ باعىتىندا ۇسىنىستار مەن پىكىرلەر ايتىلدى. وبلىستىق فيليالدىڭ جاڭا ءتوراعاسىنا ساتتىلىك تىلەپ، ادەبيەتتى قولداۋ باعىتىندا تىڭ باستامالاردى قولعا الىپ، قايراتكەرلىك تانىتارىنا سەنىم ءبىلدىردى.
اقىن مۇرات بەكەي، جازۋشى، ادەبيەت زەرتتەۋشىسى قۇلبەك ەرگوبەك، اقىن نۇرماحان نازاروۆ جانە وزگە دە قالامگەرلەر ۇسىنىس-پىكىرلەرىن ورتاعا سالدى.
رۋحاني باس قوسۋدى تۇيىندەگەن ساكەن قالقامانوۆ جيىنداعى باستامالار ەسكەرۋسىز قالمايتىنىن جەتكىزدى.
«تۇركىستان قالاسىندا ءتۇرلى مادەني نىساندار بوي كوتەرىپ، باسىم كوپشىلىگى پايدالانۋعا بەرىلدى. ەندى وسى مادەني نىسانداردا ءتۇرلى ادەبي ءىس-شارالار، اقىن-جازۋشىلاردىڭ كەشتەرى، جاڭا تۋىندىلاردىڭ تۇساۋكەسەرلەرى ءوتىپ تۇرادى. الداعى ۋاقىتتا قازاقستان جازۋشىلار وداعىمەن بىرلەسە وتىرىپ، تۇركىستان ءوڭىرىنىڭ رۋحانياتىنا وڭ وزگەرىستەر الىپ كەلەتىن ماڭىزدى جۇمىستاردى بىرگە اتقاراتىن بولامىز»، - دەدى ول.
