پەتروپاۆلدا ماماندار كوپىر قۇرىلىسىنا نەلىكتەن كارتون قولدانعانىن ءتۇسىندىردى

قۇرىلىسشىلاردىڭ «تەحنولوگياسى» الەۋمەتتىك جەلىدە كوپشىلىكتىڭ تالقىسىنا تۇسكەن ەدى، دەپ حابارلايدى قازاقپارات ءتىلشىسى.

پەتروپاۆل مەن جۇمىسشى كەنتىن قوساتىن نەگىزگى كوپىرلەردىڭ ءبىرى ەكى اپتادان بەرى جوندەلىپ جاتىر. ياعني كوپىر 28- قازاننان بەرى اۆتوموبيل قوزعالىسىنا جابىق. قالانىڭ ورتالىعىنا كۇندە قاتىنايتىن تۇرعىندارعا بۇل ءبىراز قيىندىق اكەلدى.

مامانداردىڭ ايتۋىنشا، كوپىر 2014 -جىلى كۇردەلى جوندەلگەن، وسى ماقساتقا 500 ميلليون تەڭگە جۇمسالعان. ۋاقىت وتە جولدىڭ بەتون پليتالارى سوگىلگەن. ونى ورتاشا جوندەۋگە 21 ميلليون تەڭگە ءبولىندى.

«جۇمىستار اياقتالۋعا جاقىن. 5 س م اسفالت- بەتون قوسىندىسىن توسەدىك. ەندى بەتون پليتالارىنىڭ اراسى قايتا اشىلىپ، جەزدەن جاسالعان كومپەنساتور قويىلادى. كەيىن ۇستىنە تاعى دا اسفالت توسەلەدى. بۇل تەحنولوگيا كوپتەگەن ەلدەردە قولدانىلادى. ولاي ەتپەگەن جاعدايدا ەكى بەتوننىڭ قوسىندىسى ءتۇزۋ بولماي، تولقىندانىپ تۇرادى»، - دەيدى جوبا اۆتورى سەرگەي چۋريلوۆ.

جاقىندا الەۋمەتتىك جەلىدە كوپىردىڭ قۇرىلىسىنا قاتىستى بەينەجازبا پايدا بولدى. قۇرىلىسشىلار نىساندى جوندەۋ بارىسىندا كارتون قاعازدى، تاقتايلاردى قولدانعان. بۇل ءادىس كوپشىلىكتىڭ سىنىنا قالىپ، ءاجۋاعا اينالدى.

«ول كارتون، ەسكى- قۇسقىنى تەسىكتەردى جابۋ ءۇشىن ۋاقىتشا قولداندىق. ويتكەنى كوپىردىڭ استىنان تەمىرجول وتەدى. قۇرىلىس ماتەريالى تەمىرجولعا ءتۇسىپ، قاۋىپ تۋدىرۋى مۇمكىن»، - دەيدى سەرگەي چۋريلوۆ.

پەتروپاۆل قالالىق اكىمدىك وكىلدەرىنىڭ ايتۋىنشا، كوپىردەگى جوندەۋ جۇمىستارى ءبىر اپتانىڭ ىشىندە اياقتالماق.

«كوپىرگە جوندەۋ جۇرگىزۋ ءۇشىن جاز ۋاقىتىندا ەكى رەت كونكۋرس وتكىزدىك، ناتيجە بولمادى. سوندىقتان قىركۇيەك ايىندا «ماگيسترال- س ك» ج ش س كەلىسىمشارتقا وتىرىپ، وڭتۇستىك- ورال تەمىرجولىمەن ءتيىستى كەلىسىم جاسالعاننان كەيىن جۇمىستار باستالدى. كەلەسى اپتادا كوپىر پايدالانۋعا بەرىلەدى»، - دەيدى پەتروپاۆل قالالىق تۇرعىن ءۇي- كوممۋنالدىق شارۋاشىلىعى، جولاۋشىلار كولىگى جانە اۆتوموبيل جولدارى ءبولىمىنىڭ باسپا ءسوز حاتشىسى اسەم ايتۋلوۆا.

اۆتور: اقەركە داۋرەنبەك قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى