قاراعاندى وبلىسىندا كۇزگى- قىسقى اڭ اۋلاۋ ماۋسىمى باستالدى
1-قاراشادان باستاپ قاراعاندى وبلىسىندا تەرىسى باعالى اڭداردى اۋلاۋ ماۋسىمى اشىلدى. ول 15 -اقپانعا دەيىن جالعاسادى.
«قازىرگى ۋاقىتتا قاراعاندى وبلىسىنىڭ اۋماعىندا 139 اڭشىلىق شارۋاشىلىعى بار، ونىڭ ىشىندە 106 سى اڭشىلىق پايدالانۋشىلارعا بەكىتىلگەن، ال 33 ءى ۋاكىلەتتى ورگانمەن وزگەشە بەلگىلەنبەسە، اۋماعىندا اڭ اۋلاۋعا تىيىم سالىنعان رەزەرۆتىك قوردا. جانۋارلاردىڭ جاسى مەن تۇرلەرىنە سايكەس اڭ اۋلاۋدى جۇزەگە اسىرۋدى، سيرەك كەزدەسەتىن جانە جويىلىپ بارا جاتقان جانۋارلار تۇرلەرىنىڭ تىرشىلىك ەتۋ ورتاسىن ساقتاۋ جانە جاقسارتۋ ماقساتىندا جانۋارلار دۇنيەسىنە ۇقىپتى قاراۋدى سۇرايمىز»، - دەپ اتاپ ءوتتى قاراعاندى وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى.
اڭ اۋلاۋدى ۇناتاتىنداردىڭ ءتيىستى قۇجاتتارى بولۋى قاجەت: جانۋارلار دۇنيەسىن پايدالانۋعا رۇقسات، اڭشى كۋالىگى، اڭشىلىق شارۋاشىلىعى سۋبەكتىسىنىڭ جولدامالارى. وق قارۋىمەن اڭ اۋلاۋ كەزىندە - ازاماتتىق قارۋ مەن ونىڭ پاتروندارىن ساقتاۋعا جانە الىپ جۇرۋگە رۇقسات قاعازى. اڭ اۋلاۋ، سونداي- اق جانۋارلاردىڭ سيرەك كەزدەسەتىن تۇرلەرىن جويۋ ەرەجەلەرى ساقتالماعان جاعدايدا زاڭ بۇزۋشىلار براكونەرلىك ءۇشىن جاۋاپقا تارتىلاتىن بولادى.
