جايىق وزەنىنىڭ سۋى مەن اۋاسىنا زەرتتەۋ جاسالدى
عىلىمي زەرتتەۋدىڭ ناتيجەسىن ق ر پرەمەر-ءمينيسترىنىڭ ورىنباسارى رومان سكليار تانىستىردى، دەپ حابارلايدى قازاقپارات ءتىلشىسى.
«2021-2024-جىلدارعا ارنالعان قازاقستان-رەسەي اراسىنداعى جايىق وزەنى باسسەينى ترانسشەكارالىق سۋ نىساندارىن قولدانۋ جانە قورعاۋ تۋرالى ىنتىماقتاستىق باعدارلاماسى اياسىندا «جايىق ترانسشەكارالىق وزەنى باسسەينىندەگى اعىندى رەتتەۋدىڭ سالدارىن ەكولوگيالىق باعالاۋ جانە وزەندى ساقتاۋ مەن قالپىنا كەلتىرۋ جونىندە عىلىمي نەگىزدەلگەن ۇسىنىستاردى ازىرلەۋ» تاقىبىرىندا عىلىمي زەرتتەۋ جۇرگىزۋدىڭ تەحنيكالىق تاپسىرماسى ازىرلەندى»، - دەلىنگەن رومان سكلياردىڭ دەپۋتاتتىق ساۋالعا بەرىلگەن جاۋابىندا.
ونىڭ ايتۋىنشا، جايىق وزەنىنىڭ لاستانۋى مەن ونىڭ ەكولوگيالىق جاعدايىنىڭ ناشارلاۋ سەبەبىن انىقتاۋ ماقساتىندا كەشەندى زەرتتەۋ جۇمىسى جۇرگىزىلگەن.
«ب ق و جانە اقتوبە وبلىسى اۋماعىنداعى سۋ ساپاسىنا جۇرگىزىلگەن كەشەندى زەرتتەۋدىڭ ناتيجەسىندە 4 جانە 5-ساناتقا، ال اتىراۋ وبلىسىنداعى سۋدىڭ ساپاسى 1-4 ساناتقا جاتاتىنى انىقتالدى. سول سەكىلدى زەرتتەۋ بارىسىندا اتموسفەرالىق سىناما الىنىپ، ناتيجەسى بويىنشا اۋانى لاستايتىن قالدىق زات انىقتالمادى. ودان بولەك، وتكەن جىلى قازان ايىندا جايىقتاعى سۋ شارۋاشىلىعى جاعدايىن جاقسارتۋ ماقساتىندا ءبىرىڭعاي جول كارتاسى ازىرلەنىپ، بەكىتىلدى»، - دەيدى ول.
پرەمەر-مينيستردىڭ ورىنباسارى جايىق وزەنىنىڭ ەكولوگيالىق احۋالىن رەتتەۋگە قاتىستى شارالار قازاقستان مەن رەسەيدىڭ ورتاق باعدارلاماسى اياسىندا ەكىجاقتى ءجۇرىپ جاتقانىن ايتتى.
«بيىل 3- اقپاندا جايىق وزەنىنە قاتىستى ءبىرىڭعاي جول كارتاسى اياسىندا قازاقستاندىق ساراپشىلاردىڭ جۇمىس كەستەسى، ۋاقىتى مەن ۇيىمداستىرۋ فورماتىنا قاتىستى ءىس-شارالار بەكىتىلدى. ءۇشىنشى باعىت بويىنشا جايىق وزەنىندە بەكىرە سانىن ارتتىرۋ، كانالدار مەن سۋ جۇيەلەرىن قايتا جاڭارتۋ، وزەن ارناسىن بەكىتە ءتۇسىپ، وزەن جاعاسىندا ورماندى قالپىنا كەلتىرۋ قاراستىرىلعان. ودان بولەك وزەن ءتۇبىن تەرەڭدەتۋ، تازارتۋ جۇمىسى جانە باسقا دا ءىس-شارالار جوسپارلانعان»، - دەدى رومان سكليار.
