دارەجان ومىربايەۆ توكيو كينوفەستيۆالىندە «ۇزدىك رەجيسسەر» اتاندى
«قازاق فيلم» كينوستۋدياسى تاراتقان مالىمەتكە سەنسەك، دارەجان ومىربايەۆ 34- توكيو حالىقارالىق كينوفەستيۆالىنىڭ كونكۋرستىق باعدارلاماسىنا قاتىسقان «اقىن» فيلمى ءۇشىن «ۇزدىك رەجيسسەر» جۇلدەسىن جەڭىپ العان.
بۇل تۋرالى بۇگىن فەستيۆالدىڭ جابىلۋ سالتاناتىندا بەلگىلى بولدى.
«فەستيۆالدىڭ قازىلار القاسى وسى جۇلدەنى دارەجان ومىربايەۆقا بەردى، ويتكەنى بىزگە فيلمدەگى رەجيسسەردىڭ تەك وزىنە ءتان قولتاڭباسى ەرەكشە ۇنادى، - دەدى قازىلار القاسىنىڭ مۇشەسى كريس فۋدجيۆارا (Chris Fujiwara).
«بۇل فيلم پوەزيا تۋرالى عانا ەمەس، سونداي-اق وسى ونەردى باعالامايتىن زاماندا اقىن بولۋدىڭ قانشالىقتى قيىن ەكەنىن كورسەتەتىن تۋىندى. بۇگىنگى كۇنى بۇل پروبلەما تاۋەلسىز كينوگەرلەردىڭ الدىندا تۇر دەسەم ارتىق ايتقانىم ەمەس. بۇل فيلم - ادامزاتتىڭ رۋحاني دامۋىنا تەڭدەسسىز ۇلەس قوساتىن ونەرگە نەمقۇرايلى قارامايتىن ادامداردىڭ ەڭبەگى».
قازاقستاندىق رەجيسسەر ءوز سوزىندە «اقىن» فيلمىن جوعارى باعالاعان قازىلار القاسى مەن فەستيۆال كورەرمەندەرىنە العىسىن ءبىلدىرىپ، كوركەم تۋىندىنىڭ ناقتى باعاسىن ۋاقىت بەرەتىنىن اتاپ ءوتتى.
«بۇل - مەنىڭ عانا ەمەس، بۇكىل ءتۇسىرىلىم توبىنىڭ، سونداي-اق «قازاق فيلم» كينوستۋدياسىنىڭ جەڭىسى. وسىنداي جۇلدەلەر توقتاماي جۇمىس ىستەۋگە جىگەر بەرەدى، كوپ راحمەت»، - دەدى دارەجان ومىربايەۆ.
ەستەرىڭىزگە سالا كەتسەك، ق ر مادەنيەت جانە سپورت مينيسترلىگى تاپسىرىسى بويىنشا «ۇلتتىق كينونى قولداۋ مەملەكەتتىك ورتالىعى» قولداۋىمەن ش. ايمانوۆ اتىنداعى «قازاق فيلم» ا ق تۇسىرگەن «اقىن» فيلمى ديدار ەسىمدى مويىندالماعان جازۋشىنىڭ ءومىرى تۋرالى باياندايدى.
فيلمنىڭ سەناريى نەمىس جازۋشىسى گەرمان گەسسەنىڭ «اۆتورلىق كەش» جەلىسى بويىنشى جازىلعان.
فيلمدەگى باستى ءرولدى «جىگىتتەر» توبىنىڭ ءانشىسى ەردوس قانايەۆ سومدادى. كينوتۋىندىنىڭ ءتۇسىرىلىمى الماتى قالاسىندا ءوتتى. كارتينانىڭ قويۋشى وپەراتورى بوريس تروشيەۆ، قويۋشى سۋرەتشىسى الەكساندر روروكين. فيلمنىڭ پروديۋسەرلەرى - يۋليا كيم جانە ەرجان احمەتوۆ.
1980-جىلدان بەرى وتكىزىلىپ كەلە جاتقان Tokyo International Film Festival - حالىقارالىق كينوپروديۋسەرلەر قاۋىمداستىعى فەدەراتسياسىنىڭ (FIAPF ) تىركەۋىنەن وتكەن، «ا» ساناتىنداعى الەمدەگى ۇزدىك 15 كينوبايقاۋدىڭ قاتارىنا كىرەتىن بەدەلدى فەستيۆالدەردىڭ ءبىرى.
