اتىراۋدا «بەكەت اتا» كىتابى اعىلشىن تىلىندە جارىق كوردى
س. وتەبايەۆ اتىنداعى اتىراۋ مۇناي جانە گاز ۋنيۆەرسيتەتىنىڭ رەكتورى گۇلزادا شاكۋليكوۆانىڭ ايتۋىنشا، بۇل يدەيانى اتالعان وقۋ ورداسىندا جۇمىس ىستەيتىن «بولاشاق» باعدارلاماسىنىڭ تۇلەكتەرى قولعا الىپتى. بىرنەشە شەتەل ءتىلىن بىلەتىن جاستار اقمەشىت قورىمىنا بارعاندا وسىنداي شەشىمگە بەكىنگەن.
«عاجايىپ قاسيەتىمەن ەل- جۇرتتىڭ جادىندا جاتتالعان ابىزدىڭ ءبىرى - بەكەت اتا. ونىڭ ادام تاڭدانارلىق ەرەكشە قاسيەتى مەن كورەگەندىگى، ساۋەگەيلىگى مەن ساۋلەتكەرلىگى اڭىزعا بەرگىسىز اڭگىمەلەر جەلىسى نەگىزىندە ءالى كۇنگە ۇرپاقتان- ۇرپاققا جالعاسىپ كەلەدى. تارىققانعا - دەمەۋ، جابىققانعا جەبەۋ بولىپ، قينالعاندا ارۋاعىنان مەدەت سۇراعان جاننىڭ تىلەگىن قابىل ەتكەن بەكەت اتانىڭ سان قىرىن كەيىنگى ۇرپاققا ناسيحاتتاۋ ءۇشىن كىتاپ جازعان ەدىم» - دەيدى جىلىوي اۋدانىنداعى اقمەشىت قورىمىندا ۇزاق جىل شىراقشى بولعان يسلام قاجى مىرزابەك ۇلى.
شىراقشىنىڭ «بەكەت اتا» كىتابى اعىلشىن تىلىنە اۋدارىلىپ، جارىققا شىقتى. شەكسپير تىلىندەگى 300 بەتتىك كىتاپتىڭ تارالىمى - 1000 دانا.
«ماقساتىمىز - ۇلتتىق قۇندىلىقتار مەن اسىل مۇرالارىمىزدى ۇرپاقتان- ۇرپاققا جەتكىزۋگە ۇلەس قوسۋ. ويتكەنى، ۇلى دالا تاريحى - حالقىمىزدىڭ ماڭگىلىك مۇراسى. سول سەبەپتەن، ۇلتتىق قۇندىلىقتارىمىزدى ۇلىقتاپ قانا قويماي، بابالاردان جەتكەن شەجىرەلى تاريحىمىزدى وزگە تىلدە ناسيحاتتاۋدى پارىزىمىز سانادىق»، - دەيدى گۇلزادا شاكۋليكوۆا.
ەسكە سالا كەتەلىك، بۇدان بۇرىن اتىراۋدا جازۋشى راقىمجان وتاربايەۆقا ارنالعان كىتاپ تانىستىرىلعانىن جازعان بولاتىنبىز.
اۆتور: بەك مۇستافا
