داۋرەن ابايەۆ: مونوقالالاردى باسقارۋ ءپرينتسيپى وزگەرۋى ءتيىس

«مونوقالالار كەڭەس داۋىرىنەن قالعان مۇرا دەسەك بولادى جانە ول قالالار جوسپارلى ەكونوميكا ساياساتىنا ساي قۇرىلعان. تاۋەلسىزدىك العالى زامان وزگەردى، تيىسىنشە مونوقالالاردى باسقارۋ ءپرينتسيپى دە وزگەرۋى ءتيىس. بۇگىنگى تاڭدا مونوقالالاردىڭ پروبلەماسى كوپ. قازىرگى ۋاقىتتا ەلىمىزدە 27 مونوقالادا 1,5 ميلليون ادام تۇرىپ جاتىر. ول قالالاردىڭ بۇگىنگى سيپاتى حالىقتىڭ جاپپاي كوشۋى، الەۋمەتتىك دەپرەسسيا، جۇمىسسىزدىق تا بار. وعان ازىپ-توزعان كوممۋنالدىق ينفراقۇرىلىمدى قوسىڭىز»، - دەدى داۋرەن ابايەۆ «حابار» تەلەارناسىندا وتكەن «اشىق ديالوگ» سۇحباتىنىڭ كەزەكتى سانىندا.

ونىڭ ايتۋىنشا، كەيبىر مونوقالالاردى اسىراپ وتىرعان تابيعي رەسۋرستار قورى ازايىپ بارادى.

«سوندىقتان پرەزيدەنت ماسەلەنى بۇگىننەن قولعا الىپ، بولاشاعى جوق مونوقالالاردىڭ تۇرعىندارىن ءىرى قالالارعا كوشىرۋدى ۇسىنىپ وتىر. ارينە، ول ءۇشىن الدىمەن جاعداي جاساۋ كەرەكتىگىن ۇمىتپاعان ءجون. ءبىراق تۇرعىنداردى كوشىرۋ ماسەلەسى بارلىق مونوقالالارعا قاتىستى ەمەس. دامۋ بولاشاعى زور مونوقالالار دا بار. الەۋەتى بار قالالار ءۇشىن ارنايى دامۋ جوسپارى قابىلدانىپ، اسىرەسە ەكونوميكاسىن ءارتاراپتاندىرۋ باعىتى بويىنشا شارا قولعا الىنادى. كەيبىر مونوقالالار ءىرى قالالاردىڭ ماڭىندا ورنالاسقان، ونداي قالالار اگلومەراتسيا ءپرينتسيپى بويىنشا وركەندەي تۇسەتىن بولادى»، - دەيدى ول.

سونداي-اق، ق ر پرەزيدەنت اكىمشىلىگى باسشىسىنىڭ ءبىرىنشى ورىنباسارى مەملەكەت باسشىسى مونوقالالارعا قاتىستى اۋقىمدى تالداۋ جۇمىسىن جۇرگىزۋدى تاپسىرعانىن ايتتى.

تالداۋدىڭ ناتيجەسىندە مونوقالالار ساناتقا ءبولىنىپ، ول تۋرالى ب ا ق بەتتەرىندە حابارلاناتىن بولادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى