جەر بەتىنەن جويىلىپ كەتۋى مۇمكىن ەلدەر اتالدى
كليماتتىڭ وزگەرۋى اسەرىنەن زارداپ شەگۋى مۇمكىن اۋماقتارعا كيريباتي، تۋۆالۋ جانە مارشالل ارالدارى جاتادى.
كيريباتيدەگى عالامدىق ەكولوگيالىق ۇكىمەتتىك ەمەس ۇيىم Climate Action Network كوورديناتورى پەلەنيزا الوفانىڭ ايتۋىنشا، گلازگوداعى ب ۇ ۇ سامميتى ارال مەملەكەتى ءۇشىن ماڭىزدى وقيعا. ول تەڭىز دەڭگەيىنىڭ كوتەرىلۋى مەن تروپيكالىق داۋىلداردىڭ كۇشەيۋى ادامدار ءومىرى مەن اۋىل شارۋاشىلىعىنا قاۋىپ توندىرەتىنىن ەسكە سالدى.
«ءبىز ءبىر رەتتىك وقيعالار تۋرالى ايتىپ وتىرعان جوقپىز. ۇيلەردى تولىق قيراتۋ قاۋپىن توندىرەتىن تابيعي قۇبىلىس تۋرالى ايتىپ وتىرمىز»، - دەپ كەلتىرەدى الوفانىڭ ءسوزىن Express گازەتى.
باسىلىم مالىمەتىنشە، كيريباتيدىڭ بۇرىنعى پرەزيدەنتى انوتە تونگ گلازگوداعى COP26 سامميتىندە سويلەگەن سوزىندە ەلگە كليماتتىڭ وزگەرۋىنەن تۋىندايتىن قاۋىپتەر تۋرالى ايتتى. سونداي-اق، ول اۆستراليانىڭ وسى سالاداعى ساياساتىن سىنعا الدى، دەلىنگەن ماقالادا.
عالىمدار جاھاندىق جىلىنۋدىڭ جاعىمسىز اسەرىن ازايتۋ ءۇشىن جەردەگى تەمپەراتۋرانىڭ كوتەرىلۋىن سەلسي بويىنشا ءبىر جارىم-ەكى گرادۋس شەگىندە شەكتەۋ قاجەت ەكەنىن بىرنەشە رەت ايتتى. وسى ماقساتتا 2015 -جىلى 190 نان اسا مەملەكەت وسى ماقساتقا جەتۋ ءۇشىن ناقتى ءىس- قيمىل جوسپارىن قاراستىراتىن پاريج كەلىسىمىنە قول قويدى.
