قازىر وتاندىق كونتەنتتى قاراۋشىلار ۇلەسى ۇلكەن قارقىنمەن ءوسىپ كەلەدى - مينيستر

بۇل تۋرالى ۆەدومستۆو باسشىسى ايدا بالايەۆا ءمالىم ەتتى، حابارلايدى قازاقپارات ءتىلشىسى.

«قازىر ينتەرنەت سايتتار - امبەباپ حابار تاراتۋ قۇرالىنا اينالعانىن كورىپ وتىرمىز. بۇگىندە ءبىر سايتتىڭ ىشىنەن جازبا اقپاراتتى دا، اۋديو حابارلامانى دا، بەينە-باعدارلامالاردى دا تابۋعا بولادى. مىسالى بۇگىندە مەملەكەتتىك قولداۋعا يە ehistory.kz جانە adebiportal.kz ،el.kz ،inform.kz ،baq.kz سياقتى سايتتاردا قازاق تىلىندەگى ماتەريالدار زاماناۋي فورماتتاعى بەينە جازبالار، اۋديوپودكاستار وقىرماندارعا قولجەتىمدى. بۇگىندە جاستار اراسىنداعى ەڭ سۇرانىسقا يە قوسىمشالاردىڭ ءبىرى - «TikTok» الەۋمەتتىك جەلىسى. بۇل رەتتە، e-history.kz پورتالى «تيكتوكەر تاريحشى» پاراقشاسىن اشىپ، جاستارعا جەڭىل ءارى قىسقا تۇردە ەلىمىزدىڭ تاريحىن تۇسىندىرەتىن اقپارات بەرەدى»، - دەدى ايدا بالايەۆا قازاق تىلىندە كونتەنت جاساۋشىلاردىڭ ءداستۇرلى فورۋمىندا.

مينيستر وسى ايدان باستاپ وتاندىق تەلەارنالاردىڭ رەيتينگى ونلاين رەجيمگە شىعارىلاتىنىن جەتكىزدى.

«بۇعان دەيىن قوعام تاراپىنان مەديا ولشەۋ جۇيەسىن جەتىلدىرۋ تۋرالى ۇسىنىستار ايتىلعان بولاتىن. وسى ورايدا، ءبىز وسى ايدان باستاپ مينيسترلىكتىڭ سايتىندا زاماناۋي IP تەحنولوگيالاردى پايدالانا وتىرىپ، جاڭا جۇيەنى ىسكە قوستىق. ونىڭ نەگىزىندە، قىزىعۋشىلىق تانىتقان كەز كەلگەن ازامات بارلىق قازاقستاندىق تەلەارنالار مەن باعدارلامالاردىڭ رەيتينگىلەرىن live-رەجيمدە كورە الادى. قازىر وتاندىق كونتەنتتى قاراۋشىلار ۇلەسى ۇلكەن قارقىنمەن ءوسىپ كەلەدى. بۇگىندە قازاقستان مەديا نارىعىنداعى شەت ەلدىك جانە وتاندىق ارنالار رەيتينگىسىندە ۇزدىك توپ-10-دىقتى ءبىزدىڭ وتاندىق تەلەارنالار يەلەندى. مۇنىڭ ءوزى ءبىزدىڭ ۇلتتىق تەلەونىمدەردىڭ باسەكەگە قابىلەتىنىڭ جىلدان-جىلعا ارتىپ كەلە جاتقانىن كورسەتەدى»، - دەدى مينيستر.

اۆتور: ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى