ەلوردادا قازاق مەملەكەتىنىڭ قالىپتاسۋ تاريحى تۋرالى قولجازبالار كورمەگە قويىلدى

نۇر- سۇلتان قالاسىنداعى قولجازبالار جانە سيرەك كىتاپتار ۇلتتىق ورتالىعىندا اشىلعان كورمەگە 100-دەن استام قولجازبا قويىلدى. كورمە بىرنەشە تاريحي كەزەڭدى قامتيدى. اتاپ ايتقاندا، تۇركى قاعاناتى، قاراحاندار، التىن وردا جانە قازاق حاندىعى زامانى.

«ءبىز قازاق حالقىنىڭ مەملەكەت بولعانىن كورسەتكىمىز كەلدى. ول XV عاسىرعا سايكەس كەلەدى. ويتكەنى، كەيبىر ساياساتكەرلەر بىزدە مەملەكەت بولعان ەمەس، قازاق حالقى العاش مەملەكەت بولىپ كەڭەس وداعى كەزىندە 1936 -جىلى قۇرىلدى دەگەندى العا تارتادى. ال 16 - عاسىرداعى تاريحي دەرەكتەردە قازاق، قازاق مەملەكەتى دەگەن ءسوز كەزدەسەدى. قاراساڭىز، «قازاق مەملەكەتى» دەگەن ءسوز جازىلعان. بۇل «مەحمان ناما بۋحارا» اتتى قولجازبا»، - دەدى قولجازبالار جانە سيرەك كىتاپتار ۇلتتىق ورتالىعىنىڭ باس ساراپشىسى المات ءابسالىقوۆ.

ونىڭ ايتۋىنشا، اتالعان ورتالىقتا تاريحي قولجازبالارمەن قاتار سيرەك كەزدەسەتىن كىتاپتار دا ساقتاۋلى.

«قولجازبالاردىڭ قاتارىندا «تاريح- ي راشيدي»، «مەحمان ناما بۋحارا»، «تاريح دجاحون ارا» بار. ەڭ كونە قولجازبا Ⅺ عاسىرعا تيەسىلى ءجۇسىپ بالاساعۇننىڭ «قۇتتى بىلىك» قولجازباسى. بىزدە ونىڭ كوشىرمەسى ساقتالعان. ودان بولەك، ءبىزدىڭ ورتالىقتا اباي قۇنانبايەۆ پەن ىبىراي التىنساريننىڭ العاشقى ەڭبەكتەرى ساقتالعان»، - دەيدى ول.

قولجازبالار كورمەسى ەل تاۋەلسىزدىگىنىڭ 30 جىلدىق مەرەيتويىنا وراي ۇيىمداستىرىلىپ وتىر. شارانىڭ اشىلۋ سالتاناتىنا ەلىمىزدەگى تۇرىكمەنستان، وزبەكستان جانە تۇركيا مەملەكەتىنىڭ ەلشىلەرى قاتىستى. كورمە جەلتوقسان ايىنىڭ سوڭىنا دەيىن جالعاسادى.

اۆتور: ءالي يبرايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى