ايدا بالايەۆا: ۇلتتىق جوبالار - رۋحاني دامۋعا باعىتتالعان ۇلتتىق ماسەلەلەر

كەزدەسۋدە «ۇلتتىق رۋحاني جاڭعىرۋ» باعىتى بويىنشا اقپارات جانە قوعامدىق دامۋ ءمينيسترى ايدا بالايەۆا، مادەنيەت جانە سپورت ءمينيسترى اقتوتى رايىمقۇلوۆا، ءبىلىم جانە عىلىم ۆيتسە- ءمينيسترى شولپان كارينوۆا باياندادى، دەپ حابارلايدى قازاقپارات.

«ۇلتتىق جوبالاردىڭ بارلىعى دا تۇتاس قوعامنىڭ رۋحاني دامۋىنا باعىتتالعان ۇلتتىق ماسەلەلەر. بۇل جوبالار نەگىزىنەن حالىقتىڭ جاس ەرەكشەلىكتەرىنە قاراي توپتاستىرىپ، ناقتى اۋديتورياعا ارنالىپ وتىر. ماسەلەن، بالا- باقشالار مەن باستاۋىش مەكتەپ بالالارىنا - «ۇلتتىق تاربيە» جوباسى، ورتا مەكتەپ وقۋشىلارىنا ارنالعان - «اقىلدى ۇرپاق»، جوعارى سىنىپ وقۋشىلارى مەن ستۋدەنت جاستاردى قامتيتىن - «كەمەل بولاشاق» جوبالارى ناقتى جاستار اۋديتورياسىنا باعىتتالادى»، دەدى مينيستر ايدا بالايەۆا.

بۇدان بولەك، ۆەدومستۆو باسشىسى «ۇلتتىق رۋحاني جاڭعىرۋ» ۇلتتىق جوباسىنىڭ ءۇشىنشى نەگىزگى باعىتتارىنىڭ ءبىرى - «تاۋەلسىزدىك ۇرپاقتارى» باعىتىنا دا توقتالىپ ءوتتى . ونىڭ ايتۋىنشا، جوبا 2025 -جىلعا دەيىن جاستاردىڭ نەگىزگى بازالىق سۇرانىستارى: تۇرعىن ءۇي ماسەلەسى، جۇمىسپەن قامتۋ، ساپالى ءبىلىم بەرۋ، بەلسەندى جاستاردى قوعامدىق ىستەرگە تارتۋ، جاستاردىڭ ستارتاپ- جوبالارىن قولداۋ بويىنشا «تاۋەلسىزدىك ۇرپاقتارى» گرانتتارىن ءبولۋ، ەكولوگيالىق ساۋاتتىلىقتى ارتتىرۋ سەكىلدى ماسەلەلەردى شەشۋدى قاراستىرادى.

«جالپى، «تاۋەلسىزدىك ۇرپاقتارى» باعىتى بويىنشا: - 2025 -جىلعا دەيىن ۆولونتەر جاستاردىڭ سانىن 2 ميلليونعا دەيىن ارتتىرۋ؛

- «جاسىل ەل» جوباسى اياسىندا 30 مىڭنان استام قالا جانە اۋىل جاستارىن جۇمىسپەن قامتۋ؛

- جۇمىسسىز جۇرگەن جانە وقۋ وقىمايتىن NEET ساناتىنداعى جاستار ۇلەسىن % 5- عا دەيىن تومەندەتۋ؛

- جاستار ۇيىمدارىنا ارنالاتىن جوبالاردى قارجىلاندىرۋ كولەمىن 1,5 ەسەگە ارتتىرۋ؛

سونىمەن قاتار، - 2025 -جىلى - 1,2 ميلليون جاستاردى جاپپاي بۇقارالىق سپورتپەن اينالىسۋىن قامتاماسىز ەتۋ ناقتى كوزدەلگەن.

بۇل اتالعان جوبالاردىڭ بارلىعى رەسپۋبليكانىڭ ءار وڭىرىندە بار جاستار رەسۋرستىق ورتالىقتارى ارقىلى جۇزەگە اساتىن بولادى.

ءمينيستردىڭ مالىمەتىنە سايكەس، قازىرگى تاڭدا وتاندىق ارنالاردا تاريحي- تانىمدىق باعىتتاعى 30-دان استام ارنايى باعدارلاما بار. سونىمەن قاتار، تاريحي سەريالدار ءتۇسىرۋ جوباسى قولعا الىنعان. ال، مەملەكەتتىك تەلەارنالارداعى باعدارلامالار مەن سەريالدىق ونىمدەردىڭ % 30- ى تاريحي تاقىرىپتا. ماسەلەن، تاريحي- تانىمدىق باعىتتاعى «جۇمابەك تاشەنوۆ»، «دومالاق انا»، «ساراي سىرى»، «جامبىل جابايەۆ» سىندى تاريحي تۇلعالارعا ارنالعان 13 تەلەسەريال كورەرمەن نازارىنا ۇسىنىلعان.

اتالمىش جوبالاردى نازارعا الا كەلە، كەزدەسۋ سوڭىندا، ەل رۋحانياتىنىڭ بەلسەندىلەرى، زيالى قاۋىم وكىلدەرى بۇل اۋقىمدى جوبالار ءبۇتىن ءبىر ەلدىڭ الدىندا تۇرعان ورتاق مىندەت ەكەنىن اتاپ ءوتىپ، قازاقستاندىقتاردىڭ ءومىر ءسۇرۋ ساپاسىن جاقسارتۋعا جانە ەكونوميكانىڭ باسەكەگە قابىلەتتىلىگىن ارتتىرۋعا باعىتتالعان ۇلتتىق جوبالاردى ساپالى جۇزەگە اسىرۋ ءۇشىن بىرلەسىپ جۇمىس جاساۋعا دايىندىعىن ءبىلدىردى.