سوت بانكتىڭ الماتىلىق اتقىشتىڭ ايەلىنە قاتىستى تالابىن قابىلدامادى
بانك الماتىلىق اتقىش يگور دۋجنوۆتىڭ وتباسىنىڭ مۇلكىن پايدالانۋعا كەدەرگى جاساماۋدى سۇرادى، - دەپ حابارلايدى Tengrinews.kz ءتىلشىسى بوستاندىق اۋداندىق سوتىنىڭ باسپا ءسوز قىزمەتىنە سىلتەمە جاساپ.
سوت مالىمەتىنشە، بۇعان دەيىن بانك دۋجنوۆتىڭ ايەلى انايد دەميرچياننىڭ كەپىلگە قويىلعان مۇلىكىن اۋكسيوندا جەڭىپ العان. وعان جەر تەلىمى بار تۇرعىن ەمەس ءۇي-جاي تيەسىلى. بيىل 30-ساۋىرىندە بانك بۇل نىسانعا مەنشىك قۇقىعىن تىركەگەنى ايتىلدى.
«دەميرچيان ءىس جۇزىندە جانە زاڭدى تۇردە داۋلى مۇلىك يەسى بولماسا دا، وعان تالاپ قويىلعان. سونىمەن قاتار، دەميرچيان بانككە مەنشىك يەسى رەتىندە تۇرعىن ەمەس ءۇي-جايلاردى پايدالانۋعا كەدەرگى كەلتىرەتىنى تۋرالى سوتقا ەشقانداي دالەل كەلتىرىلمەگەن»، - دەدى اۋداندىق سوتتىڭ باسپا ءسوز قىزمەتى وكىلدەرى.
سونداي-اق، سوت مۇلىكتى ءتورت جەكە تۇلعا جالعا العانىن انىقتادى. بۇرىنعى يەسى دەميرچيان مۇلىكتى ءۇشىنشى تۇلعالارعا جالعا بەرگەنى ايتىلدى.
«سونىمەن قاتار، جالعا بەرۋ شارتتارى بانك تاراپىنان داۋلانبادى، ولار دەميرچيانمەن بانك مەنشىك قۇقىعىن تىركەگەنگە دەيىن، ياعني زاڭدى تۇردە ۇزاق مەرزىمگە، دالىرەك ايتساق، 12 ايعا جاسالعان.
وسىنى ەسكەرە وتىرىپ، شەشىم قابىلداۋ كەزىندە سوت تالاپكەر دۇرىس ەمەس جولدى تاڭداعان دەگەن قورىتىندىعا كەلدى. شاعىم قابىلدانبادى. سوت شەشىمى زاڭدى كۇشىنە ەنگەن جوق جانە وعان تاراپتار شاعىم جاساي الادى»، - دەپ قورىتىندىلادى سوت.
ەستەرىڭىزگە سالا كەتەيىك، وقيعا 20-قىركۇيەكتە كەشكە بولعان، شامامەن ساعات 17.20-شاماسىندا اقبۇلاق مولتەكاۋدانىنداعى ءۇي يەسىنىڭ ءبىرى اڭشى مىلتىعىنان وق اتقان. كۋاگەرلەردىڭ ايتۋىنشا، اتىس ءبىر مينۋت ىشىندە بولعان.
الماتىلىق اتقىش بەس ادامدى ءولتىردى. قازا بولعاندار اراسىندا ەكى پوليتسيا قىزمەتكەرى، سوت ورىنداۋشىسى، سونداي-اق ءۇيدىڭ جاڭا يەسى مەن كۋاگەر بار. الماتى قالاسىنىڭ اكىمى باقىتجان ساعىنتايەۆ قازا تاپقانداردىڭ تۋىستارىنا كوڭىل ايتتى.
كەيىن پوليتسەيلەر بەس ادامدى اتىپ ولتىرگەن كۇدىكتىنى ۇستادى. بۇل ءساتتى كۋاگەرلەر ۆيدەوعا ءتۇسىرىپ العان. ول - 1997 -جىلدان بەرى وسى جەردە تۇراتىن 54 جاستاعى ءۇيدىڭ قازىرگى يەسى. ەگەر ونىڭ كىناسى دالەلدەنسە، ەر ادام 20 جىلعا باس بوستاندىعىنان ايىرىلۋى مۇمكىن.
كەيىن ۇيگە قاتىستى داۋ نەسيە تولەمەگەندىكتەن تۋىنداعانى بەلگىلى بولدى. ءۇي بانككە كەپىلگە الىنعان. كەيىن ءۇي بانك مەنشىگىنە ءوتىپ، ودان كەيىن جەكە ادامعا ساتىلعان. جەكە سوت ورىنداۋشىلار پالاتاسى بورىشكەرگە ءۇيدى بوساتۋ كەرەگىن 2020 -جىلدان بەرى بىرنەشە رەت حابارلانعانى ايتىلدى.
