سولتۇستىك قازاقستان تۇرعىنى قۇس ءوسىرىپ، تابىسقا كەنەلدى
ول بۇعان دەيىن 25 جىل مەملەكەتتىك قىزمەتتە جۇمىس ىستەگەن، دەپ حابارلايدى قازاقپارات ءتىلشىسى.
ءوڭىر تۇرعىنى زاۋرەش قوشانوۆا بىلتىر ءومىرىن كۇرت وزگەرتۋگە بەل بۋادى. وسىلايشا كوپتەگەن ارمانداعان ءوز ءىسىن اشۋ ءۇشىن مەملەكەتتىڭ قولداۋىنا جۇگىنبەك بولادى.
«25 جىل مەملەكەتتىك قىزمەتتە جۇمىس ىستەدىم. بۇل از ەمەس، ادەتتە وسىنشا ۋاقىتتان كەيىن باسقا سالاعا اۋىسۋ وڭاي ەمەس. دەسەك تە، سول كەزدە قابىلداعان شەشىمىمە وكىنبەيمىن. ادام وزگەرىستەن قورىقپاۋى كەرەك. ءارى ويلاعاندى جۇزەگە اسىرۋعا «باستاۋ بيزنەس» مەملەكەتتىك باعدارلاماسى كومەكتەسەدى. مەن وقۋعا ءوتىنىش بەردىم، كۋرستى جانە قورىتىندى تەستىلەۋدى وڭاي تاپسىردىم. سۇرانىس پەن وتكىزۋ نارىعىن تالداعاننان كەيىن قۇس شارۋاشىلىعى باعىتىن تاڭدادىم. بيزنەس- جوسپار ازىرلەپ، ونى ءساتتى قورعاپ، 584 مىڭ تەڭگە كولەمىندە گرانت الدىم»، - دەيدى كاسىپكەر.
بۇل قاراجاتقا زاۋرەش قوشانوۆا قۇس قورا سالىپ، 250 مەكيەن جانە 220 برويلەر تاۋىعىن ساتىپ الادى.
«ارينە، قۇس ءوسىرۋ - بۇل وتە ءتيىمدى بيزنەس، ونىڭ ءبىرقاتار ارتىقشىلىقتارى بار. يا، باستاپقىدا ناتيجەسى قالاي بولار ەكەن دەپ قورىقتىم. قيىندىقتى جەڭۋگە وتباسىم كومەكتەستى. جۇمىرتقا مەن قۇس ەتىنە قاشا دا سۇرانىس جوعارى. سوندىقتان ءونىم ەش قيىندىقسىز ساتىلىپ جاتىر. نەگىزگى بولىگىن حالىق تىكەلەي ۇيدەن ساتىپ اكەتەدى. ارتىلعانىن جەرگىلىكتى دۇكەنگە وتكىزەمىن»، - دەيدى زاۋرەش قوشانوۆا.
برويلەرلەردىڭ ءبىرىنشى پارتياسىن بورداقىلاپ، ساتقاننان كەيىن، كاسىپكەر تۇسكەن قاراجاتقا 120 قاز ساتىپ العان. بولاشاقتا زاۋرەش تەك قاز وسىرۋمەن اينالىسۋدى جوسپارلاپ وتىر. ءىسىن جاڭا باستاعان ايەل قۇس فەرماسىن اشىپ، ءىسىن كەڭەيتپەك، قوسىمشا جۇمىسشىلار الماق. س ق و كاسىپكەرلەر پالاتاسىنىڭ ديرەكتورى الىبەك اشمەتوۆتىڭ ايتۋىنشا، بيىل «باستاۋ بيزنەس» جوباسى بويىنشا 922 سولتۇستىكقازاقستاندىق وقۋدان وتكەن.
«بيىل تۇلەكتەردىڭ 613 ى گرانت الدى، ال ءوز ءىسىن اشۋعا 170 ادام جەڭىلدەتىلگەن نەسيە الدى، ونىڭ ىشىندە ءبىر نەسيە وڭىرلىك كاسىپكەرلەر پالاتاسى جانىنان قۇرىلعان «اتامەكەن- قىزىلجار» ميكروقارجى ۇيىمى ارقىلى بەرىلدى»، - دەيدى الىبەك اشمەتوۆ.
اۆتور: اقەركە داۋرەنبەك قىزى
