جۇزگە جۋىق قازاقستاندىق ۆيزا الامىن دەپ اقشاسىنان ايىرىلدى

ولار الماتى قالاسىنداعى ۆيزالىق قولداۋ كورسەتەتىن جەكە كومپانياعا جۇگىنەدى. ءوزارا كەلىسىم جاساپ، بارلىعى قۇجاتتارىن تاپسىرادى. ءبىراق الگى مەكەمە اياقاستىنان ۇشتى- كۇيلى جوق بولادى. ەكى ورتادا ارانداپ قالعان ولار ءبىزدىڭ رەداكسياعا جۇگىندى. شەتەلدە ءبىلىم الۋ جانە جۇمىس ىستەۋدى كوزدەگەن دانيار توقبەرگەنوۆ ەلدە سابىلىپ ءالى ءجۇر. سەبەبى ۆيزالىق جەكە كومپانيا وكىلدەرى ونى سان سوقتىرعان. تالاي كوك اقشانى كولدەي توكتىم دەگەن ول ەندى قايدا بارىپ كىمنەن كومەك سۇرارىن بىلمەيدى. ۆيزالىق قولداۋ ورتالىعى باسشىسى ەكى ايدان بەرى ۇستاتپاي ءجۇر دەيدى.

دانيار توقبەرگەنوۆ، قالا تۇرعىنى:

- مەن سۇراعان اقشاسىن بەردىم. 428 مىڭ تەڭگەگە ارنايى شارت جاساستىق. ەكى اي ىشىندە امەريكالىق ۋنيۆەرسيتەتتەن شاقىرتۋ الدىم. تاعى 500 مىڭ بەر دەدى، سۇراعانىن جىبەردىم. تولەمنەن كەيىن ولار كونسۋلمەن سۇحبات بولاتىنىن ايتتى. مىنە، سودان بەرى قانشاما ۋاقىت ءوتتى. حابار- وشارسىز جوعالدى. اقشام دا، ۆيزا دا جوق.

شەتەلدى اڭساعان جاستىڭ ءبىرى - ادەل امانوۆا. ايتۋىنشا، تەك ءوزى عانا ەمەس، تاعى 100 شاقتى ادام وسى كومپانيا الداۋىنا تۇسكەن. ولاردىڭ جالپى شىعىنى 10 ميلليون تەڭگەدەن اسادى. ول شيكىلىكتىڭ بارىن سەزگەن ساتتە ءبارى كەش ەدى. سەبەبى اقشانى العاندار ءىزىن سۋىتقان. الەۋمەتتىك جەلىدەن ءوزى ىسپەتتەس الدانعانداردى تاۋىپ، پوليتسياعا ارىزدانىپتى.

ادەل امانوۆا، قالا تۇرعىنى:

- مەن استانادان، الماتىدان زارداپ شەككەن ادامداردى تاپتىم. الەۋمەتتىك جەلىدە چات قۇرىپ سويلەستىك. ول جەردە 100 شاقتى ادام بار. ينستاگرامدا وسى «Hasta La Visa» كومپانياسىنىڭ وكىلى ءانۋار دەگەن ازامات سەرىكتەسى الداعانىن جازادى. ءبىراق ول دا جاساعان ىسىنە جاۋاپ بەرۋى ءتيىس دەپ ويلايمىن. سەبەبى شارتتى ءبىز وسى اداممەن جاسادىق.

اتالعان كومپانيا وكىلدەرى بىزگە رەسمي جاۋاپ بەرۋدەن باس تارتتى. قۇزىرلى ورگانداردىڭ ايتۋىنشا قازىر سوتقا دەيىنگى تەرگەۋ «الاياقتىق» بابى بويىنشا قوزعالعان. الدانعان ادامدار اقشانى قايتارىپ قانا قويماي، سونىمەن بىرگە وسى ىسكە قاتىسى بار بارلىق جاۋاپتىلاردىڭ قىلمىستىق جاۋاپكەرشىلىككە تارتىلعانىن سۇرايدى.

سالتانات ازىربەك، قالالىق پوليتسيا دەپارتامەنتىنىڭ رەسمي وكىلى:

- قازىر سوتقا دەيىنگى تەرگەپ تەكسەرۋ جۇرگىزىلىپ جاتىر. وسى ۋاقىتقا دەيىن 40 ادام ارىزداندى. كۇنى كەشە ەكى كۇدىكتى ءىس بويىنشا قاماۋعا الىندى.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى